Ilulissani borgmesteri pakatsivoq

Air Greenlandip siunnersuutigaa Nuummi Ilulissanilu mittarfiit 1200 meterinut tallinissaat naammattoq.

Anthon Frederiksenip timmisartorsuarnit tikinneqartalerusunnertik ima tunngavilersorpaa.

- Soorunami pisortap oqaasii tupaallannarput, minnerunngitsumik Ilulissani mittarfiup tallineqarnissaa ukiorpaalussuarnngulersuni kommunalbestyrelsep tamarmiusup sulissutiginikuummagu, borgmesteri oqarpoq.

Namminersornerullutik Oqartussat Ilulissat aamma Nuup Kommunii peqatigalugit ukiut qulit missaanni mittarfinnik tallisaanissaq pilersaarusiorpaat.

- Inassutigineqarpoq imminut akilersinnaanerpaassasoq 1800 meterinut tallisitsisoqarpat. Taanalu Ilulissat kommunalbestyrelseata aalajangiusimavaa, Anthon Frederiksen oqarpoq.

Kangerlussuup Narsarsuullu silaasa allanngujaannerat pillugu, taakku kisimik timmisartorsuarnut mittarfigineqarnerat naammattoq, Air Greenlandip pisortaa Michael Binzer ullaaq oqarpoq. Tamannali borgmesterip isumaqatiginngilaa.

- Pingaartumik Kangerlussuup inissisimalluarnera silaatalu allanngujaannera tamanit ilisimaneqarpoq, kisianni pinngortitap silallu anngoriartornerata takutereerpaa Kangerlussuaq silarluttalersoq. Tusartuartarparput timmisartorsuaq Danmarkimeersoq minngitsoorluni utiinnartariaqalersimasoq, Anthon Frederiksen oqarpoq.

Ilulissat mittarfiata 1799 meterinut tallinissaa akilersinnaanerpaanerarpaa.

- Takornariat aamma soqutigaat akikinnerusumik Ilulissanukartarnissartik. Aamma Ilulissaniit nunanut allanukartussat toqqaannarlugu aallartalissapput. Angallattut amerlanerpaat avannaani Ilulissaniit kujataanilu Nuumminngaanneersuusarput, taakkuuppummi mittarfiit imminnut akilersinnaasumik ingerlasutuat, Anthon Frederiksen taama oqarpoq.

Nuup borgmesteria oqaaseqartinniaraluaratsigu iluatsitsinngilagut.