Ilulissani 100-t soraarsitaassapput
Ilulissani sulisitsisut peqatigiiffiannit annilaanngatigineqarpoq sulisumit affaat soraarsittariaqassallugit sanaartugassat annertusarneqanngippata. - Sanasut ilinniartut ilinniarsimanngitsutullu sulisorisagut 100-nik ikilisariaqassavagut. Ilinniartuuteqalernissarpullu qunugaarput, ilinniartoqarnermi pisussaaffiit isumagisinnaassanerlutigit nalugatsigu, Ilulissani GAmi siulittaasoq Ingolf Skov oqarpoq. Sanasup Knud Andersenip aamma annilaanngatigaa suliffiutillit arlallit matuinnartariaqarnissaat.
Qaasuitsup kommuneani Ilulissat avataanniittuni suli ajornerussasoq sulisitsisut oqaatigaat. Taamaammallu sanaartugassat unittissimasat aallartinneqarnissaat kaammattuutigaat. 1975mili namminersortunngorama aatsaat taamak ajortigisumik misigisaqarpunga, Ingolf Skov oqarpoq.
-Ilulissani suliffiutillit sulisuminnik affaannanngortitsinissaminnik oqariartuuteqarnerat upperiuminaatsippara, borgmester Jess Svane akissuteqarluni oqarpoq. Ilulissanilu inissiat 30 saniatigut AMSip nutarneqarnissaa erseqqissaatigalugu. Annilaanngatiginerarpaali Ilulissat avataanni sanaartornermik suliallit akornganni suliffissaarusimaartoqalerumaartoq.
