Iluliarujussuup Qaqortutut angitigisup Nunatta Isua avaqquppaa
Ilulissap taama angitigisup nunap isuani naammattuugassaanera ulluinnarsiutaanngilaq, iluliarsuarli 2 kvadratkilometerisut angitigioq Qaqortup sineriaata avataani ulluni makkunani takuneqarsinnaavoq. Iluliarsuaq sikumik nalunaarsuisartumut DMI-imeersumut Jacob Wedell-Toppimut atsiunneqarsimavoq taamaatumillu maanna Topp Isbjergimik taaguuteqartinneqarluni.
Allattoq Peter Troelsen, Simon Uldum
aggustip 06-at 2013 08:49
Iluliarsuit Topp Isbergitut angitigisut Kujataata imartaani ulluinnarsiutaanngikkaluarlutik, iluliarsuit manissut siornatigut tamaani takuneqartarsimapput. Tunup avannaarsuata sineraani sikuernerata nalaani pisarpoq. Tappavanimi iluliarpassuit 100-200 meterinik itissusilinni ikkarlittarput, DMI nittartakkamini taama allappoq.
Ukiut tuusintilikkuutaat nikinnerisa kingorna iluliarsuit manissut Zacharie Isbræmeersut 76-Fjorden Isbræmeersullu Tunup Kujataatalu sineriaanni, DMI-p timmisartumik nakkutilliisuisa 'Ispatruljen'-ip ukioq kaajallallugu nakkutigisaani takuneqartarput.
Ilulissanik ingerlaartarfigisaannillu ilisimasat Nunatta imartaani uuliamik gassimillu ujarlernermut annertusiartuinnartumut pingaaruteqarput.
