Iluliarujussuaq Innaarsunniit 100 meteritut ungasitsigisumiittoq

Iluliarujussuit Upernaviup avannaani Innaarsummiunut takornartaanngillat – iluliarujussuarmillu Innaarsunniit 100 meterit missaattut ungasitsigisumi maanna ittoqaqqippoq.

Iluliarujussuaq taanna Danmarkip silasiorfia DMI naapertorlugu 250x180 meterit missaattut annertutigaaq. 

Iluliarujussuup taassuma annertoqatipajaanik Innaarsuit eqqaanni ukiut marluk matuma siorna aamma ikkarlittoqarpoq – taamaammat inuit taamanikkut iluliarujussuaq aseroraluarpat tassaarsuaqaratarsinnaanera ernummatigilerpaat. Innaarsummiut immap eqqannguani najugallit illunut allanut qutsissumiittunut taamanikkut qimagussorput - ilaatigullu katersortarfik qimagussortunut aamma piareersimatinneqarluni.

Upalungaarsimasulli isumaqarput, tamatumuuna navianartumik pisoqaratarnavianngitsoq. 

- Iluliarujussuaq Innaarsuit avannaatungaanniimmat navianartumik pisoqaratarnissaa ilimananngitsoq, Innaarsunni qatserisartut pisortaat isumaqarpoq, Avannaata Kommuniani upalungaarsimasut pisortaat Jens Dahl oqarpoq.

Assi © : Ari G. Mørch

Assiliisoq: Ari G. Mørch

Paasissutissat politiinut ingerlateqqinneqareerput – iluliarujussuarlu aserussagaluarpat Innaarsummiut qanoq iliornissartik ilisimavaat.

Jens Dahl taama oqarpoq. 

- Iluliarujussuit Innaarsummiunut takornartaanngillat, aamma aserulillaraangamik neeqqorpalulillaraangamillu navianartumik pisoqarataannaasartoq ilisimavaat. Taamaammat qutsissumukarlutik qimagussortarput, Jens Dahl oqarpoq nangillunilu: 

- Taamalu pisoqassappat taamaaliornissaannut kajumissaarpakka. Iluliarujussuaq aserussagaluarpat sualummik immap killingani najugallit qutsissumukassapput, taanna oqarpoq. 

AAMMA ATUARUK Innaarsuit eqqaannit ilulissap illikarnera takuuk

Iluliarujussuarlu maannakkorpiaq navianartorsiortitsinngitsoq, DMI naliliivoq.

- Innaarsuit aarlerinanngitsumi immap itisuup killinganiippoq. Iluliarujussuaq aserussagaluarpat umiatsiaaqqat malissuarnit uligarneqarlutik aseruatitersinnaapput. Ilimanarluinnarporli iluliarujussuaq ulinnerani anorlerneranilu ungavarumaartoq, sikunik ilisimasalik DMi-meersoq Jens Jakobsen oqarpoq.

Assi © : DMI

Qaammataasiamit assilisat DMI-meersut

Innaarsummiut ukiut marluk matuma siorna qujanartumik navianartorsiortitaanngillat. Taamanikkut iluliarujussuaq assarnernera ulinneralu pissutigalugit kaanngariarluni ungavartermat Innaarsunni tassaarsuaqanngilaq.

2017-imili ajornerujussuarmik pisoqarpoq, Uummannammi eqqaani Nuugaatsiap eqqaani nunap taamanikkut sisoornerata kingunerisaanik tassaarsuaqarpoq.

Inuit sisamat ajunaarput, aqqanillit aqqunartiterput illorpaaluillu avalugussaallutik.

Nuugaatsiaq nunaqarfillu sanilia Illorsuit inuerunnikuupput.