Iluliarujussuaq Innaarsuit avannaaniittoq unnuap ingerlanerani nikissimanngilaq

Innaarsunni innuttaasut aamma sillimasuutitat politiillu, iluliarujussuup nunaqarfiup tungaanut illuariartulernissaa  arfininngornermi ernummatigileraluarpaat, avannalermat.  

AAMMA ATUARUK - Eqqumiitsumik misigisimanarpoq

Iluliarujussuaq arfininngornermi unnukkulli inissisimaffimminit  nikissimanngitsoq, politiini pigaartut pisortaat Aqqaluk Petersen nalunaarpoq.

- Ullaap tungaani pujorpoq, kisianni ilualiarujussuaq takuneqarsinnaanani. Sapaammi ullaap tungaani qulinut nunaqarfimmiit nalunaarutigineqarpoq, iluliarujussuaq nikissimanngitsoq, Aqqaluk Petersen oqarpoq.

Politiit upalungaarsimasuutitallu pissutsit naliliiffiginiarlugit ataasinngornermi ataatsimiissapput.

Upalungaarsimatitsineq atuutsiinnarneqarpoq.

AAMMA ATUARUK Iluliarujussuaq Innaarsuit tungaanut illikarsinnaavoq avannamik - nakkutilliisuutitat malinnaapput

Upalungaarsimasuutitat tassaapput umiarsuaq sinerissammi nakkutilliissut Knud Rasmussen Innaarsuit eqqaani piareersimatinneqartoq, helikopteri annaassiniarnermi atorneqartartoq Kangerlussuarmiit Ilulissanut nuunneqartoq nunaqarfinnut Innaarsuit eqqaanut ingerlanissaanut piareersimatinneqartoq.

Taakkua saniatigut, iluliarujussuup inissisimanera pillugu qanimut malinnaapput politiit aamma Avannaata Kommuniani upalungaarsimasut.