Iluliarujussuaq Australiap tungaanut ingerlaarpoq
Iluliarujussuaq sikuiuitsumit kujallermit kaanngarsimavoq maannalu Australiap tungaanut sarfaatitilerluni. Taanna Australiamit 1700 kilometerinik kujasinnerusumiittoq qaammataasamit assilisat ersersippaat, assit Australiamiumit Neal Youngimit sermersuarnik ilisimasalimmit assilisaapput.
Allattoq Elisa Isaksen
decembarip 09-at 2009 05:56
Taassuma iluliarujussuaq taanna 19 kilometerinik takissuseqarnerarpaa, taassumalu 1900-kkunniilli iluliarujussuarmik taama angitigisumik aatsaat naammattoorsisoqarnerarpaa.
Youngip naatsorsuineri naapertorlugit iluliaq 140 kvadratkilometerinik annertussuseqarpoq.
Iluliarujussuaq taanna Sikuiuitsumit Kujallermit ukiut qulit matuma siornagulli kaanngartuussangatinneqarpoq, tamaani sarfaatiterusaariarluni maanna avannamut Australiap tungaanut sarfaatitilersimasoq.
Iluliarsuaq taanna siornatigut 400 kvadratkilometerinik annertussuseqarsimagaluarpoq, maannali napisarnermigut minnerulersimalluni.
