Iluliarsuit iliveqarfiat nassaarineqarpoq

Iluliarujussuit Sikuiuitsumit Kujallermit ukiut tamaasa kaanngartartut, qeqertamut aalajangersimasumut Atlantikup kujataaniittumut tamatigut sarfaatitittarput.
Allattoq Elisa Isaksen
decembarip 16-at 2010 15:45

Tamanna tuluup imarsiuup Mark Brandonip nunarsuatsinni imavissuarnik ilisimatusartup peqatigiiffiup American Geophysical Unionsip ukiaq manna ataatsimiinneranni saqqummiuppaa.

Iluliarujussuit qeqertamut South Georgiamut Amerika Kujalliup kujatinnguaniittumut annguttarput, aakkaangamillu imeq tarajuunngitsoq liiterit milliardilikkaat tamaani immamut akuleruttarluni.

Iluliarujussuup A-38-mik taaguuserneqarsimasup imermik tarajuunngitsumik 100 milliardit tonsinik annertutigisumik imaqartoq 2004-mi eqqoriarneqarpoq.

Imeq tarajuunngitsoq immamut akulerukkaangami uumassusilinnut tamanut sunniuteqartarpoq, tappiorannartut ikiliartortaramik.

Arferit soqqallit isarukitsullu tamakkuninnga nerisaqartuupput, tappiorannartullu ikiliartoraangata piaqqiornerannut aamma sunniuteqapilussinnaalluni.

Ilisimatuulli suli misissugassaqaqimmata iluliarujussuit aakkiartornerisa uumassusilinnut sunniuteqataat pillugit sukumiinerusumik saqqummiussaqarsinnaanngikkallartut, tuluit tv-qarfissuat BBC allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq