Iluliarsuarmut apornerup kingorna annanniutinut ikisariaqarsimapput
Sikuijuitsoq kujallermi umiarsuaq nuannaariartaat ”MV Explorer” iluliarsuarmut apormat ilaasut 100 missaaniittut inuttallu 54-it annanniutinut ikisariaqarsimapput.
Umiarsuit eqqaaniittut ikiuiartormata annanniutiniittut tamarmik qaqinneqarsimapput.
Liberiami umiarsuit allattorsimaffianni allatsissimasumi umiarsuarmi qimataapput umiarsuup naalagaa naalagaaqqallu ilaat. Umiarsuaq kivissanersoq suli nalunarpoq.
USA-meersut, Tuluit, Canadamiut, Australiamiut, Hollandimiullu ilaasuupput.
“MV Explorer” sapaatip akunnerini marlunni sikuijuitsup kujalliup eqqaani nuannaarianik angallassisarpoq, umiarsuarmilu ineeraq ataaseq 40.000 koruuninik akeqarpoq, nutaarsiassaqartitsivimmi Ritzau-imi taama allaaserinnittoqarpoq.