Iluliarmiut arlallit akiligassinneqarput
Ilulissani politiit sapaatip akunnerani kingullermi biilinik unititsisaqattaarlutik misissuipput. Biilertut qulit biilinik ingerlatillutik oqarasuaatinik angallattakkanik oqaluussisimasut qitequteqaratillu biilertut, akiligassinneqarput.
Allattoq Apollo Jeremiassen
marsip 02-at 2010 05:10
Oqarasuaatinik angallattakkamik oqaluussiutigalutik biilertut 500 koruuninik akiligassinneqartarput. Kisianni oqarasuaat siutikkut tusarnaarutilik atorlugu biilinik ingerlaarneq inerteqqutaanngilaq.
- Biilimik ingerlaartilluni assaat illugiillutik biilip aquutaaniissapput, imaanngitsoq assaap illuatungaanik oqarasuaat tigummillugu ingerlaajutigaluni oqaluussisoqassasoq. Oqarasuaatit angallattakkat siutikkut tusarnaarutillit, tassa tigumminngikkaluarlugit oqaluussissutaasinnaasut atornissaat kujumissaarutigaarput, Ilulissani politiineersoq Kasper Berthelsen oqarpoq.
