Iluliarmioq matuvoq
Siornatigut aviisimi aaqqissuisuusimasup Karo Thomsen Fleischerip tamanna ajuusaarutigaa.
- Aallartikkatta nammineq kajumissuserput tunngavigalugu sulinikuuvugut. Kingusinnerusukkut allat aamma ingerlatsitsilernikuugamik.
Taamatut unissimanera sutigut innuttaasunut eqquiva?
- Ilisimasanik ataatsimut pigisinnaasanik amigaateqalernikuuvugut. Pisortaninngaanniit nalunaarutigineqartartut imaluunniit innuttaasut pisortanut nalunaarutiginiagaat amigaataalernikuupput, kiisalu innuttaasuninngaanniit innuttaasunut paasissutisseeqatigiinneq amigaataalernikuulluni.
Ilulissani borgmesteri Anthon Frederiksen, Kattusseqatigiit oqarpoq, soorunami Iluliarmiut aviiseqarnissamik pisariaqartitsisut, 2008-mulli aningaasartuutissat aalajangersarneqareermata qanoq iliortoqarsinnaanngitsoq.
Qaasuitsup kommunerujussuassaani borgmesterinngortussaq Jess Svane, Siumut, oqarpoq kommunerujussuassami attaveqaatit atorlugit tamanut siaruarterisarnissaq soqutigilluinnarneqartoq, illoqarfinnilu arfineq pingasuusuni innuttaasut pitsaasumik sulianut tunngassutilinnik siammarteriffigisarnissaat pingaartinneqartoq.