Iluliamerngit Københavnimi
![Isen bliver hentet uden for Nuuk](/sites/default/files/styles/image_934x467/public/article_images/isfangst.jpg?itok=-2U9veWz)
Københavnip illoqannginnersaani, Råshuspladsenimi aqagu takuneqarsinnaassapput iluliamerngit aqqaneq marluk Nunatsinneersut nalunaaquttatullusooq iliorarneqarsimasut.
Tamanna eqqumiitsuliaq taaguuserneqarpoq Ice Watch, tassa nalunaaqutaq sermiusoq. Taanna islandimiumit eqqumiitsuliortumit, Olafur Eliassonimit sanaajuvoq, Minik Rosingimillu pilersaarusiorneqarsimalluni.
Eqqumiitsuliaq sananeqarpoq, silap pissusaa pillugu Naalagaaffiit Peqatigiit aaqqissugaanik, Københavnimi sapaatip akunnerani tullermi ataatsimeersuarnissaq sioqqullugu.
Ataatsimeersuarnermi tassani peqataassapput, sila pillugu ilisimatuut hunnujorujunik arlaqartut nunanit assigiinngitsunik 200-neersut. Taakku ilaasa saqqummiutissvaat ilisimatusanerminni killiffitsik ilaatigut eqqartussallugu silap allanngoriartornerata pilersitaanik nunarsuatsinni atugassarititaalersut ilaatigut aamma eqqartorneqassalluni qanoq iliornikkut allannguutinut naleqqusarsinnaanerput.
- Inuiaqatigiit ilisimasaat, periuserilersimasaat nalunaarusiaallut allaavigalugit allanguisoqarsinnaanngilaq, Minik Rosing oqarpoq, neriuutigalugulu eqqumiitsuliaq qanoq iliornissamut eqqarsalersitsisinnaassasoq.
Iluliamerngit illoqannginnersamut iliorarneqartussat katullutik 100 tonsinik oqimaassuseqarput taakkulu Nuup avataani katersaallutik. Qerititsivissuarnullu ikillugit umiarsuarmik Danmarkiliaanneqarlutik.
Eqqumiitsuliortoq Olafur Eliasson isumaqarpoq, silap pissusaata allanngoriartornera qanimut takuneqarnissaa pingaaruteqartuusoq.
- Iluliamerngip aakkiartornerani nipit tusaaneqarsinnaasut takunnittut misigisinnaassavaat, taamaalillutik tamanna qaninnerusutut misigilersitsissalluni, Eliasson oqarpoq.
Eqqumiitsuliaq Ice Watch oktobarip 29-ata tungaanut illoqannginnersamiisinnaqartussatut naatsorsuutaavoq, tamatuma kingorna iluamerngip sinneri atuarfinnut Københavnimiittunut agguaanneqassallutik.