Iluatsinngilluinnarpoq

Aaqqissuusseqqinneq ukiortaamiit aallartinneqarpoq, allannguutaasorlu tassaavoq inigisat ataasiakkaat pigineqalersinnaaneri. Ukiortaaq sioqqullugu piumasaqataagaaluarpoq inissiami inigisat 20-iugaangata taakkuninnga 15-ini najugaqartut isumaqatigiittassasut inissiap tamakkiisup pigilinnginnerani. Massakkullu tassa aaqqissuusseqqinnermi inigisat ataasiakkaat pigineqalersinnaagaluarput.

Inigisat niuernikkut tunineqarsinnaanerat naapertorlugu akimikkut inissinneqartussaapput, taamaakaaluartorli ineqarsimanerup sivisussusaa naapertorlugu akikillisaavigineqarsinnaallutik.

Sooq aaqqissuussinerup iluatsinnginnera Atassut Nuummiit imak eqqoriarneqarpoq: Aaqqissuussineq ”attartortumiit piginnittuunermut” innuttaasunut nalinginnaasunut pitsaaruttortoq inuit taakkua atorfitik aqqutigalugit aserornikuuaat. Taamaattumillu aaqqissuussinerup annerpaartaa ullumikkut atorneqarsinnaajunnaarnikuuvoq. Inuit pineqartut tassaapput naalakkersuisuusimasut Namminersornerullutillu Oqartussani atorfillit ilaat.

Aaqqissuussinerup ilorraap tungaannut ingerlalerteqqinniarlugu ineqrnermut pisortaqarfiup inigisanik tuniniaaneq INI A/S-imut suliasiissutigisimavaa, tamassumalu kingunerisaanik INI A/S aningaaserivinnut saaffiginnissuteqareerpoq aningaaserviit inigisaminnik piginnilerusuttut siunnersornissaat qulakkeerniarlugu.