Iluanaarutigigalugu puisinniartarsinnaanissaq pillugu paasiniaaqqissaartartussaq pilersinneqarpoq
Nunatsinni Ammeriviup Great Greenlandip iluanaarutigalugu misiligummik puisinniartitsinissamut qinnuteqaataa itigartinneqarpoq, tassungali atatillugu suleqatigiissitaq, nunatsinni iluanaarutigalugu puisinniartarsinnaanissaq pillugu paasiniaaqqissaartussaq, Naalakkersuisunit pilersinneqarpoq.
Great Greenlandip angallatinik puisinniutinik atorluni nunatta kitaani misiligummik iluanaarutigalugu puisinniartitsinissamik qinnuteqaataa itigartinneqarpoq.
Piniartunik puisinniartoqarluni misiligutitut piniarnissap marsip naanerani apriililluunniit aallartinnerani pinissaa Great Greenlandip qinnutigaa.
Puisinniarnermi qimaatitsiumanani nipaallisakkanik aallaaseqartitsinissaq siunertaasoq, pilertortumillu toqutsipallannissaq qularnaarniarlugu puisit aallaaneqareeraangata avaartaammik atuisoqarsinnaassasoq, Great Greenland qinnuteqaammini allassimavoq, erseqqissaatigaluguli avaartaat taamaallaat tulliutillugu atorneqarsinnassasoq soorlu Norgemiut puisinniartarnerminni taamaaliortartut, tassani puisi siullermik aallaaneqartarpoq kingornalu avaartaammik nanginneqassanersoq nalilerneqartarluni.
Qinnuteqaatip suliarineranut atatillugu Pisortaqarfik Pinngortitaleriffimmit siunnersorneqaqqusimavoq. Piujuaannartitsinissamik tunngaveqarluni killilersuinerup iluani aataartassat suli amerlanerusinnaasut, Pinngortitaleriffik uppernarsaasimavoq, aammali eqqumiigisimallugu Great Greenlandip kitaani marsimi apriilimilu aataarniarumasimanera, taamalineranigooq ataarpassuaqassappat taakku tassaanerusarmata aataavaqqat inunngorlaat imaluunniit puisit mamaartut. Tamanna pillugu iluanaarutigalugu puisinniartarsinnaanissamut sukumiisumik naliliisussanik suleqatigiissitanik Piniarnermut Pisortaqarfimmit, Inuussutissarsiornermut Pisortaqarfimmit, Pinngortitaleriffimmit, Great Greenlandimit KNAPK-millu peqataaffigineqartunik pilersitsisoqarnissaa Naalakkersuisut poorski sioqqullugu ataatsimiinnerminni aalajangiuppaat.
Europami pissutsit ilungersunartut nunarpassuit puisit amiinik niuernermik inerteqquteqalernissamik anguniagaqarfigisaat eqqarsaatigalugit Naalakkersuisut Great Greenland kaammattorpaat suleqatigiissitap kaammattuutai tamaattumik utaqqeqqaaqqullugit.
Iluanaarutigalugu puisinniartarsinnaanissaq pillugu naliliisussat Suleqatigiissitat siullermeerlutik apriilip qaammataata ingerlanerani ataatsimiigiaqquneqassasut, Piniarnermut Pisortaqrafik nalunaarpoq.
