Iluanaarniuteqarniartut mianersoqquai

Issittup pisuussutaanik iluanaarniuteqarniartut Tysklandip nunanut allanut ministerianit, Frank-Walter Steinmeierimit mianersoqquneqarput, iluanaarniuteqarniartullu inatsisinik unioqqutitsisuunerarneqarlutik.

Frank-Walter Steinmeyer Norgep qeqertaasa ilaanni Spitsbergenimiippoq, Norgellu nunanut allanut ministeria Jonas Gahr Støre peqatigalugu illoqarfik Ny Ålesund tikeraarlugu.

- Inatsisit nalinginnaasut Qalasersuarmut atuutsinneqanngillat, nunalli assigiinngitsut isumaqatigiissutaat atuutsinneqarlutik, Steinmeyer oqarpoq, nangillunilu:

- Isumaqatigiissutit susassaqartunit ataqqineqartariaqarput. Isumaqatigiissutit malinneqarpata akerleriittoqarnavianngilaq, Tysklandip nunanut allanut ministeria aviisimut Deutsche Welle-mut oqarpoq.

Qalasersuup ilamernga Ruslandimut atasoq Ruslandimiunit suaarutigineqaqqammerpoq, taannalu tunngavigalugu Frank-Walter Steinmeyer nunat tamat sakkortuumik oqariartuuteqarfigai.

Silap allanngornerata kingunipilorisai qanimut takuniarlugit Tysklandip nunanut allanut ministeria Spitsbergenimiippoq.