Illuutillit iluanaarniapiluttut inatsisartuni oqaluuserineqassapput
Ilaatigut aalajangiiffigisassatut siunnersuutit pingasut, tamarmik ineqarnermut atatillugu iluanaarniapiluttarnerit killilersimaarniarnerannut tunngasuupput.
Justus Hansen Demokraatineersoq marlunnik siunnersuuteqarpoq. Taassuma illunik tunisinermi iluanaarutit akileraaruteqartittalerusuppai, illut akikitsumik pisortanit akiligassarsineq iluaqusiullugu sananeqarsimasut iluanaarniapiluutaasinnaasarnerat akiorniarlugu taamatut siunnersuuteqarpoq. Siunnersuut naapertorlugu iluanaarniapallattut iluanaarutaasa affaat akileraarutigineqartalissapput. Illut napparneqaannangajattut tuniniarneqarnerisigut iluanaaruteqarluartut iluanaarniapallattunik taaneqarput.
Taamaammat pisortanit inuttullu nammineq akiligassarsiat illup akianiit ilanngaatigeriarlugit sinnerisa affaat akileraarutigineqartalissasut siunnersuutigineqarpoq. Pisortanit akikitsumik akiligassarsisoqarsinnaanera aallartinneqarpoq inuit nalinginnaat illutaarnissaannik oqilisaanniarlugit, taamatulli periarfissiinermik suliniutinik aallartitseqattaartartut atupiluiniartarnerat uggornartoq Justus Hansen isumaqarpoq.
Inuit nalinginnaat nunaminertanik tunineqartarnerat Justus Hansenip aamma iliuuseqarfigerusuppaa. Minnerungitsumik Nuummi inissiat nioqqutiginerisigut iluanaarniapiluttartut nunaminertanik piniartarput, naak nunaminertaq illuliorfigissamaanngikkaluarlugu ataatsimulli illut akiinik qaffassaaniarneq siunertariinnartarpaat. Taamaammat kikkulluunniit nunaminertanik piniarlutik qinnuteqartarnerat eqquiniarnermut assigusutut atorneqaannalerpoq.
Nunaminertanik atuinissamut inatsit siorna atuutsinneqalersoq Justus Hansenip sukateriffigerusuppaa, nunaminertanik tunitittut sanaartorniakkaminnut pilersaarummik saqqummiisartussanngorlugit sanaartornerullu akissaqartinneqarneranut uppernarsaasartusssanngorlugit. Taassumalu saniatigut sanaartorniakkap ukiut marluk qaangiutsinnagit naammassineqarsimanissaa piumasaqaataasalissasoq siunnersuutigineqarpoq. Inuit nalinginnaat akornanni illunik nioqquteqartarneq attatiinnarniarlugu namminersorlutik suliffeqarfiutillit sanaartorniarnerminnni nunaminertanik qinnuteqartarsinnaanissaat attatiinnarsinnaanngorlugu inatsisip ilusilerneqarnissaa Justus Hansenip kissaatigaa. Inuit nalinginnaat illuuteqarnerat Olga Poulsen Berthelsenip, IA-meersup aamma upernaakkut ataatsimiinnerminni sammerusuppaa. Ininik attartortut pillugit malittareqqusat sukaterneqarnissaat taassuma siunertaralugu ineqarneq pillugu maalaaruteqarsinnaanermi periarfissaq pisortat iniutaanniittunuinnaq periarfissaatinnagu aammali inunnit nalinginnarnit attartortut maalaaruteqarnissaannut periarfissiinissaq siunnersuutigaa. Siunnersuutaasup malittaanik init pillugit maalaaruteqartarfik inuit nalinginnaat attartortitsisartut sinniisuinik ilaasortaqalissasoq aamma siunnersuutigineqarpoq.
Justus Hansenip Olga Poulsen Berthelsenillu siunnersuutaat pingasut Inatsisartuni marsip
