Illut 30.000 koruuniinnallit
Ulloqeqqanut Radioaviisimi eqqartorneqarpoq, nammineerluni illuliassat, ”Illorput 2000”, Upernavimmi assut sanaartorneqarlualersimasut.
Taama ittunik piserusuttut amerliartuinnarput, tassami akigitinneqartup 5 procentiinnaa piserusuttup taamaallaat akilissavaa. Illulu taamaattoq ukiut 33-t qaangiukkaangata pigilivinneqarsinnaasarpoq.
Ineqarnermi pisortaqarfimmi immikkoortortami pisortaq Olafur Nielsen ima nassuiaavoq.
- Soorunami inissiaatileqatigiiffimmut A/S INI-mut qinnuteqaammik siullermik nassitsisoqassaaq. Qinnuteqaatillu ukiut tamaasa nalilersorneqartarput.
Qinnuteqartoq kommunemini nunaminertamik tunineqarsimassaaq, taamalu illup akiata 5 procentia kisiat akilissallugu, Olafur Nielsen nassuiaavoq.
Tanna nassuiaaavoq, nunaqarfinni avinngarusimasunilu, kiisalu illoqarfinni illoqarnermikkut nunaqarfittuulli atugassarissaanngitsoqarfiusuni nammineerluni illuliassat taama ittut sananeqarsinnaasartut.
Taamatuttaaq illuliornissamik qinnuteqartoqarsinnaanerarpaa, illoqarfinni soorlu Narsami, Maniitsumi, Aasianni, Qasigiannguani Qeqertarsuarmilu.
Olafur Nielsen erseqqissaatillugu aperaarput, illu 600.000 koruuninik nalilik eqqarsaatigalu, illumik nutaarsuarmik pisisoq taamaallaat 30.000 koruuniiginnassanersoq ilumoornersoq.
- Tamanna ilumoorpoq, tamannalu polikkikkut aaqqitaavoq, Olafur Nielsen oqarpoq.
Taanna aperaarput, soorlu Nuummi inissaaleqisoqaqimmat periarfissaq tamanna ammaanneqarsinnaannginnersoq.
- Siusinnerusukkut 2000-kkut nikinnerisa nalaanni ukiuni sisamani periarfissaagaluarpoq, soorlu Sisimiuni Nuummilu, periarfissarli taanna 2001-mi matuneqaqqippoq, nunaqarfinnut tapiinissap salliutinneqalernera pissutigalugu, Olafur oqarpoq.
Taassuma eqqaamaqquvaa, illu naammasseriigaq uani pineqanngimmat, illuliornissamulli atortussat 30 tonsit missaanni oqimaassusillit pineqartarmata, illutaarniartullu nammineerluni sanasussaammagu, taamaattumillu suliangaatsiarujussuusartoq.
- Sanaartorneqarneri unikaallakkaluariarlutik massakkut kingumut sanaartorneqartorujussuanngorput, oqarpoq.
Nangillunilu erseqqissaavoq, nammineerluni illuliat pillugit naalakkersuisut allannguutissamik siunnersuuteqarmata, tamannalu inatsisartuni 2007-mi naliliiffigineqartussaammat.
Illusisup illu ukiuni 33-ni najoreeruniuk pigilivissinnaagaa, taamalu nammineq tunerusuleruniuk qanorsuaq tunisinnaagaa, Ineqarnermi pisortaqarfimmi immikkoortortami pisortaq, Olafur Nielsen, oqarpoq.
