Illup iluani arsaannermi GM aallartiinnaqaaq

Angutit illup iluani arsaannermi pissartanngorniunnissaat Aasianni ingerlanneqassaaq timersoqatigiiffik T-41 aaqqissuisoralugu.

Unammersuartoqarnera iluatsillugu nunanut allanut unammisartutut piukkunnarsinnaasunik aamma maluginiaasoqassaaq aasamut Island Gamesqarnissaani peqataasinnaasunik.

Maanna toqqarallakkat 50-it missaanniittut 30-inut ikilineqassapput.

- Illup iluani arsaanneq silami arsaannermi allaanerungaatsiaraluartoq taamaattoq atorneqarsinnaavoq arsaattartut teknikiisa, sukkassusaasa allatigullu piginnaasaasa maluginiarnissaannut. Aamma tassani takusinnaajumaarparput toqqarallakkat piffissami kingullermi ilumut pimoorussillutik sungiusarsimanersut, taama nuna tamakkerlugu sungiusaasoq Tønnes OK Berthelsen timersoqatigiit kattuffiata GIF-ip nittartagaani issuarneqarpoq.

Nuna tamakkerlugu sungiusaasup ikiortaata Rene Olsenip unammersuarnerit malinnaaffigissavai sapaammi finale sisamap qeqqa aallartittussaq ilanngullugu.

B-67 Nuummeersoq siorna pissartanngorpoq finalemi ATA Tasiilameersoq ajugaaffigalugu. Ukiormannalu pissartanngorniunnermi iligiit 27-it peqataapput.