Illunik tuniniaasartoq nunatsinneersoq amerikami illunik tuniniaasartut nittartagaaniit atornerlunneqartoq

Instagram -ikkut videoliami kusanarluinnartumi suliffeqarfik 'Immobilium'-imik atilik siullerpaallutik kisiartaallutillu nunatsinniit illunik tuniniaasartutut nittarsaasimasut takuneqarsinnaavoq.

Illunik tuniniaasartoq nunatsinneersoq Lynges.gl videop naanerani Immobiliumip suleqatiginerarlugu oqaatigaa. Lynges.gl-ip illut tuniniagai Immobilium nittartagaani aamma nassaarineqarsinnaapput.

Ilumuunngilarli.

Lynges.gl-ip Immobiliumi suleqatiginngilaa.

– Attavigigassinga aatsaat paasivara. Inissiaatigut Immobiliumip nittartagaaniit peeqqunikuuakka suleqatiginnginnatsigumi. Nalunaaquttallu akunneri 48-t qaangiutsinnagit peerniarnerarlugit ilisimatitsivoq. Nittartakkannut innersuussisinnaasut taamaallaat akuersissutiginikuuara, Lynges.gl-imik piginnittoq Miki Lynge oqarpoq.

Nuanninngitsoq

KNR-ip nunatsinni illunik tuniniaasartut arlallit oqaluunnikuuai. Taakkulu assigiimmik misigisaqarsimasut paasinarsivoq, tassa nunatsinni inissianik nunaminertanillu piserusullutik soqutiginnittut amerlasuut attaviginnissimapput.

Miki Lynge Immobiliumimeersunit suleqatiginnilerusuttunik januarimi sianerfigineqarpoq. Kingornatigut mailimik nassiussisimapput, allamilli pisoqaqqissimanngitsoq taanna KNR-imut oqaluttuarpoq.

Taamaammat nittartakkatigut suliffeqarfiitini Immobiliumilu suleqatigiittutut saqqummiunneqarnera tupaallannaralugulu nuannarinngilaa.

- Politikkikkut inissisimaffipput eqqarsaatigissagaanni, nunani allaneersut nunatsinnut sunniiniarnerata nalaani nalusannik taamak pisoqarsimanera nuanninngilaq, taanna oqarpoq.

Inatsip nutaap nunat allat aningaasannanniarsinnaajunnaarsikkai

Naak nunanit allanit nunatsinni inissianik nunaminertamilluunniit pisinissamut soqutiginninnerusuqaleraluartoq, februaarip aallaqqaataani 2025-mi inatsip allanngortinneratigut nunanit allaneersut Kalaallit Nunaanni pigisanik nalilinnik pisisinnaajunnaarput.

Ineqarnermut attaveqaasersuutinullu naalakkersuisoqarfimmiit tusagassiorfinnut nalunaaruteqarput:

- Tunngaviusumik inuit danskisut innuttaassuseqartut, imaluunniit inuit ukiuni marlunni kingullerni Kalaallit Nunaanni aalajangersimasumik najugaqarsimasut, aammalu inuit allattorsimaffianni nalunaarsorsimasut kisimik Kalaallit Nunaanni pigisanik aalaakkaasunik pissarsisinnaalissapput. Tamatuma saniatigut pineqartup piffissami tassani oqaatigineqartumi Kalaallit Nunaannut tamakkiisumik akileraartussaatitaasimanissaa piumasarineqassaaq.

Tassa nunanit allaneersuut Kalaallit Nunaanni ukiuni marlunni najugaqarsimanngippata akileraartarsimanngippatalu inissianik pisisinnaanissaat ajornarpoq.

Tamanna præsident Trumpip Kalaallit Nunaannut soqutiginninnerulernerata malitsigisaanik aalajangiunneqarpoq, tassami Nuummi Ilulissanilu mittarfissuartaat nunatsinni pigisanik nalilinnik nunanit allanit aningaasaleerusuttunut pileriginnilersitsimmata.

Naalakkersuisuniit ima tusagassiorfinnut nalunaaruteqarput:

- Ilaatigut aningaasannanniutitut inissianik pisiortornissaq  ingalassimatinniarlugu.

KNR-i Immobiliumimit oqaaseqaammik pissarsiniarsarigaluarpoq, saaffiginnissulli suli uterfigineqanngilaq.