Illunik akikinaarilluni tunisisarsimaneq ataatsimiissutigineqassaaq

Namminersornerullutik Oqartussat illuutaannik akikinaarilluni tunisisarsimaneq pillugu nalunaarusiaq ullumi nalunaaqutaq ataatsimut inatsisartut kukkunersiuinermut ataatsimiititaliaannit ataatsimiissutigineqassaaq.
Allattoq Louise M. Kleemann
apriilip 10-at 2008 10:30

Inatsisartuni ilaasortap, naalakkersuisunullu ilaasortaasimasup Johan Lund Olsenip illu Tuapannguaniittoq, Nuummilu illoqarfiup nutaannginersaaniittoq, 2 miliuunit koruunit missaannik naleqartutut nalilerneqartoq, 680.000 koruunilerlugu pisiaraa. Aamma naalakkersuisunut ilaasortaasimasup Jørgen Wæver Johansenip illu pisiarisaa miliuunip aappaa avillugu naleqartutut nalilerneqartoq, 730.000 koruunilerlugu pisiaraa.

Pisortat inatsisitigut ingerlatsinerannut immikkut ilisimasalik, inatsisileritooq Claus Hagen Jensen ukiarmi oqarpoq naliliisinnaanini naapertorlugu illunik taamatut tuniniaaneq inatsisinik unioqqutitsinerusoq.

Nalunaarusiaq ualimut saqqummiunneqartussaq Inatsisartut Landskarsip Naatsorsuutaasa Kukkunersiorneqartarnerannut Ataatsimiititaliaanit suliakkiissutaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq