Illuikkiaq sukkulaat

Italiamiut sisamat iluarisannguaminnik – issittumi nunallit illuikkiarisartagaattut ittumik illuikkiorsimapput, illuikkiarli tamatumuuna apummik sanaajunani 100 procentimik sukkulaaginnaavimmik sanaajuvoq.

Illuikkioqataasoq 45-nik ukiulik Marco Fanti oqaluttuarpoq sukkulaamik illuikkiorneq apummit illuikkiornermit ajornarneroqisoq.

Taakku ulloq unnuarlu illuikkiorsimapput, illuikkiarlu 1 miiteri 65 centimeterisut portussuseqartoq sukkulaatinik aggukkanik 330-nik sananeqarsimavoq.

- Apummik illuikkiornermi nalinginnaasumik akunnerit pingasut atorneqarsinnaasarput, Italiami sukkulaatinik takutitsinersuaqarnerani illuikkioqataasoq oqarsimanerarpaat.

Takutitsineq qaangiuppat sukkulaammik illuikkiaq qanoq pineqarumaarnersoq ilisimaneqanngilaq. Taannalugooq 3,6 tonsinik oqimaassuseqarpoq, apummillu illuikkiatut aajatiginani.

Imaassinnaavorooq aamma meeqqat meeqqerivimmiut illutoriartoqquneqartut. Immaqa oqassapput: Illutoriartoritsigooq.