Illuatungiliuttut: Naalakkersuisut meeqqanik suusupaginnipput

Naalakkersuisut meeqqanik suusupaginnipput. Partiit naalakkersuisunut illuatungiliuttut naalakkersuisunut ammasumik allagaqaateqarnerminni taama allapput. Siunissaq ungasinnerusoq eqqarsaatigalugu suliniuteqartoqanngitsoq oqariartuutigalugu, meeqqat akornanni pissakilliornermut akisussaaffik angajoqqaanut akisussaassuseqanngitsunut naalakkersuisut inissiiniarsarisuunerarlugit illuatungiliuttut oqarput.
Allattoq Mads Lynge
maajip 08-at 2008 11:14

Oqariartuut tamanna sakkortugisassaanerluni? Naalakkersuisunut ammasumik allagaqaateqartut ilaat Asii Chemnitz Narup aperaarput, akivorlu:

- Naalakkersuisut akissuteqaataat nalilersorparput, taamaammat sakkortuppata tassa ersiutaaginnarpoq naalakkersuisut akissuteqaataanni qanoq ittuunerannik, Asii Chemnitz Narup oqarpoq.

Oqariartuutit inunnut pingaarutilinnut apunneqassappata sakkortusaartoqartariaqartoq aamma oqaatigaa, Ilaqutariinnermullu naalakkersuisuunermini angusani ima nalilerlugit:

- Eqqaamaneqassaaq meeqqanut tapiissutit qaffanneqarmata. Ulloq unnuarlu angerlarsimaffinnut aningaasaliissutit qaffanneqarput, sullinneqarnerat taamaaliornikkut pitsaanerulersinniarneqarluni, pisortaqarfik patajaalælisarneqarpoq, naalakkersuinikkullu suleriaqqissinnaaneq patajaallisarujussuarneqarluni, suliniuterpassuit taamaammat massakkut sisuualaaginnartut takusinnaavarput, Inuit Ataqatigiit sinnerlugit inatsisartunut ilaasortaq Asii Chemnitz Narup oqarpoq, ammasumillu allagaqaat oqallinnissamut qilanaartuutaanerarlugu.

Ilaqutariinnermut naalakkersuisoq Arkalo Abelsen oqaaseqartinniaraluaratsigu iluatsinngilarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq