Illuatungiliuttut Danmark spiralilersuineq pillugu nunat tamalaat eqqartuussivissuanut tunniukkusukkaat

Naalakkersuisut spiralilersuisoqarnera pillugu nalunaarusiat nutaat marluk tunngavigalugit Danmark peqatigalugu saammaateqatigiinnissamut isumalioqatigiissitaliornissamik piumasaqaateqarnerat naammanngilaq.

Illuatungiliuttut partiivi marluk tassa Siumup Naleqqallu Danmark nunat tamalaat akornanni eqqartuussivimmi attuumassuteqanngitsumi akisussaatinneqartariaqartoq isumaqarput.

- Danmarkip inuiannik nungusaaneq pillugu isumaqatigiissut naapertorlugu naalagaaffittut akisussaaffia pillugu eqqartuussut pituttuisoq Naalagaaffiit Peqatigiit Nunat Tamalaat Akornanni Eqqartuussiviannit, ICJ-mit, taamaallaat aalajangerneqarsinnaavoq, Naleraq tusagassiuutinut nalunaarummi allappoq.

Nalunaarusiat marluk tallimanngornermi saqqummiunneqartut Danmark naartunaveersaasersuinermi inuiannik nungusaasimanersoq oqaatigisnnaanngilaat. Nalunaarusiap aappaani ersarissumik taamaattoqannginneraasoqarpoq, aappaanilu taamaattoqarsinnaasoq, tamannali Naalagaaffiit Peqatigiit Nunat Tamalaaat Akornanni Eqqartuussivianni aalajangerneqassasoq oqaatigineqarpoq.

Danmark kalaallinik arnanik niviarsiaqqanillu akuersitinneqanngitsunik 1960-ikkunnit 1992 tikillugu naartunaveersaasersuigami inuiannik nungusaasimanersoq aalajangiiffigineqartariaqartoq Siumut isumaqarpoq:

- Taamaattumik Siumut isumaqarpoq, politikkikkut Naalagaaffiup Danmarkip inuiaat nungutinneqarnissaat siunertaralugu iliuuseqarsimanera inerniliutissanngikkipput, partii tusagassiuutinut nalunaarummi allappoq:

- Tamanna inatsisitigut naliliinerussaaq, nunat tamalaat akornanni eqqartuussiviup pisinnaatitaasup arlaannaannulluunniit attuumassuteqanngitsup suliarisariaqagaa, taannaavorlu aamma Inatsisartuni partiit tamarmik ataatsimooruttariaqagaat.

Danmarkip akisussaaffimmik tigusinissaa amigaataasoq

Siumup oqarnera naapertorlugu Danmarkip nunatsinnit pissutsit pisimasut isornartorsiorneqarnerat ukiuni arlalinni nipangersaateqarfiginiartarsimavai:

- Pissutsit tamakkua ulloq manna tikillugu Danskit annertunerusumik iliuuseqarfigisimanngilaat, partii allappoq: 

- Paarlattuanik nipangersaatitupajaarluunniit atorlugit annikittualunnik tunisillattaarlutik iliuuseqaqattaarput, Kalaallit Nunaannut ikinngutaalluartutut nipeqartumik pissusilersorlutik qujanarniartutut isigineqartariaqartumik.

Naleqqap spiralilersuinermut suliaq sulianut ataasiakkaanut apeqqutinngortinneqassanngitsoq isumaqarpoq: 

- Arnat Inuiaat Kalaallit ilaattut isiginerisigut pingaaruteqassusiat annikillisinnianngilarput. Arnat ataasiakkaat ataqqineqarnissaat ataatsimoortumik periutsimik imaluunniit naalagaaffiup Danmarkip akisussaaffianik toqqorteriniarnermut atorneqassanngilaq, Naleqqap siulittaasua, Pele Broberg tusagassiuutinut nalunaarummi oqarpoq.

Danmarkip inuiannik nungusaaneq pillugu isumaqatigiissut unioqqutissimallugu nassuerutiginngippagu tamanna Nunat Tamalaat akornanni Eqqartuussivimmut suliassanngortinneqartariaqarpoq.