Illuaqqamut pequtit akeqanngitsut

Pequtit sanaartornermullu atortut atoqqissinnaalluartut eqqaavimmut apuunneqartarput. Immikkoortiterisalernikkut atorsinnaasut inussaminnut nutaanut apuuttalerput.
Allattoq Noah Mølgaard
maajip 31-at 2011 13:44

Piffissami matumani saliinermi erserpoq sorpassuit atoqqissinnaagaluit inuit igiinnartaraat. Taamaammat illuaraatillit akeqanngitsumik pequtissarsiornissamut sanaartornermulluunniit atortussarsiornissamut periarfissaqarluarput. Nuummi ikuallaavik maanna immikkoortiterisalerpoq

Siniffik marluuttagaq, inimi nerrivik, reolit imaluunniit sanaartornermut atortut. Pisattat atoqqissinnaasut igiinnarneqartut ila amerlaqaat inuttakuisa nutaanik pisaarnialernerminni initoqutigiinnalerlugit igitaat. Nuummi ikuallaavimmi atoqqissinnaasorpassuit takkussorneqartuarput maannalu tamakku immikkoortiterneqartalerput. Allagartalerneqarsimapput ikuallajasut, ikuallassinnaanngitsut atoqqiinnarissallu, taamaasillutik inuit atoqqissinnaasunik ilisillutillunniit iluatinnartorsiorsinnaapput.

Nuummi ikuallaavik taamatut periuseqalerpoq eqqakkat ikilisarniarlugit. Aaqqissuussineq taanna sapaatip akunnerata naanerani saqqummiunneqarpoq Maajimi peqqissuusami aaqqissuussanut atatillugu. Nuummiut 100-ut sinnillit Champions Leaguemi finale-rtut tunuinnarlugit eqqakkanik ilisiartorlutillu iluatinnartorsiorput.

- Aaqqissuussineq suliniutaammat pitsaasoq, taava maannakkut aalajangiunneqareerpoq siunissami aamma taamatut aaqqissuussisoqartarnissaa, inuit ornigullutik qisunnik atoqqinneqarsinnaasunik ikuallaasarfimmukaanneqartunik sanasinnaallutik, Kommuneqarfik Sermersooq nalunaarpoq.