Illoqqortoormiuni takornariaqarneq siuarsalerpaat

Kommuneqarfik Sermersuup aaqqissugaanik Illoqqortoormiuni innuttaasut takornarianik kiffartuussinissamik pikkorissartinneqarput. Pikkorissartitsisoq Konrad Seblon takornartitsivimmi Destination North Greenlandimeersoq isumalluarpoq.

Pikkorissartitsineq Kommuneqarfik Sermersuup aaqqissorpaa.

Umiarsuit takornariartaatit Illoqqortoormiunut tikippata, innuttaasunit tikilluaqquneqassapput, sanaluttartut sanalukkaminnik tuniniaassapput, piniartut nuliaat sapangaaqqanik nuisaminnik tuniniaassapput, ilaatigut tamakkuupput Illoqqoortormiuni innutaasut pikkorissartinneqarneranni sammineqartut, Konrad Seblon oqarpoq.

Illoqqortoormiut eqqaat nanoqarfissuuvoq, tamanna takornariat Illoqqortoormiunut takornariarnissaannut pilerisaarutitut atorneqarsinnaavoq.

- Illoqqortoormiut eqqaat aamma umimmaqarfissuuvoq, umimmaat neqaat siallugit imaluunnit suppaliaralugit takornarianut misilitassanngorlugit sassaalliutigineqarsinnaapput, Konrad Seblon takornariartitsivimmi Destination North Greenlandimeersoq oqarpoq.

Takornarianut neqeroorutigineqarsinnaasut killeqanngillat, tamakkualu innutaasunit aningaasarsiutigineqarsinnaapput.

- Takornarianut neqerooruteqarnissamut killeqanngillat, amigaatigineqartoq tassavoq Illoqqortoormiuni innutaasut kaammattorneqarnissaat, Konrad Seblon oqarpoq.

Pikkorissartisinermi peqataasut qiimapput piumassuseqarluarlutillu, aamma pikkorissartitsinermi ilikkakkatik misilittarniarpaat. Umiarsuaq takornarianik 560-inik ilaasulik juulip ulluisa 21-anni Illoqqortoormiunut tikissaaq. Kommuneqarfik Sermersuumi innuttaasut suliffeqarfiillu umiarsuarnik takornariartaatinik aningaasannanniarnissamut pikkorissartitsineqarnerat tullia pissaaq Tasiilami marsip ulluisa 14-anni.