Illoqqortoormiuni pineqaatissinneqartussat utaqqisorpassuit

Nakuusersimallutik pineqaatissinneqarnissaminnut utaqqisut arlallit Illoqqortoormiuni inuit akornanniiginnarput. Taakku eqqartuussaanissartik pineqaatissinneqarnissartillu utaqqigaat, Illoqqortoormiuni politiitut nakkutilliisup Eigil Lyberthip oqaatigaa.

- Anstalternissaminnut massakkorpiaq utaqqisut tallimaapput, pingasut juunimi ukioq kingulleq eqqartuussivimmiit pineqaatissinneqarput, taavalu marluk novembarimi pineqaatissinneqarsimapput. Eqqartuussinissaq tulleq maajimi pissaaq, eqqartuussisut Illoqqortoormiuliassapput eqqartuussiartorlutik. Eqqartuunneqartussat anstalternissaannut pineqaatissinneqartussaapput taakkulu inuit aqqaneq-marluk pineqaatissinneqarunik katillugit ukiut marluk qaammatillu tallimat anstaltertussaassapput, Eigil Lyberth oqarpoq.

Taanna aperaarput pinerluutigineqarsimasut suunersut?

- Amerlanerpaat annersaaneq pillugu pineqaatissinneqassapput. Taakkulu ima sivisutigisumik anstaltimiissapput; ataaseq qaammat ataaseq, amerlanerit qaammatit marluk, marlullu qaammatit sisamat anstaltimiitinneqassallutik, oqarpoq.

- Sooruna utaqqisut?

- Pissutigalugu maani iluamik eqqartuussiveqannginnatta Tasiilaminngaanniit maani eqqartuussivik aqunneqarami, eqqartuussisut tamaanngartarput eqqartuussiartorlutik maani kredsdommereqannginnatta. Taava ikittoriaannarlutik ukiumut maanngartarput, suliallu aatsaat arlaqaleraangata maanngartarlutik maajimilu pilersaaruteqarput takkunniarlutik, oqarpoq.

Eigil Lyberth aamma oqarpoq, pineqaatissinneqarnissaminnut utaqqisut arlaqaleraangata nunaqqatigiit akornanni malunniuteqartartoq.

- Uanga nammineq maluginiarnikuuara eqqartuussisut sivisuumik maaniinngileraangata taava inuit pinerlunnerat annertusiartoqqittarami, soorlulusooq maani systemimut tatiginninnerat annikillisartoq.

- Illoqqortoormiuni qanoq akulikitsigisumik eqqartuussisoqartarpa?

- Ukiumut arlaqarneq ajorpoq, pingasut sisamat missaanni eqqartuussisoqarajuttarpoq, ukioq manna suli eqqartuussisoqanngilaq aatsaat maajimi, oqarpoq.

- Pinartoqartillugumi qanoq iliortoqartarpa?

- Pinartoqartillugu paarigallagassatut aalajangiussat, piaarnerusumik naammassiniarneqartarput kitaani anstaltiliaanneqarnissaat isumagineqarluni. Taamaattoqaraangat kriminalforsorgi inissarsiorniapallattarpoq, taama oqarpoq Illoqqortoormiuni politiitut sulisoq Eigil Lyberth.

Nuna tamakkerlugu politiit pisortaat Mikael Stage oqarpoq nunatsinni pineqaatissinneqarnissaminnut utaqqisut agguaqatigiissillugu qaammatini 18-ini utaqqisinneqarajuttartut.

Maannalu nuna tamakkerlugu inuit 176-t utaqqisut erseqqissaatigaa.