Illoqqortoormiuni inuussutissarsiornermik ineriartortitsinissaq ujartorneqarpoq

Erling Madsen-ip Illoqqortoormiuni ajornartorsiutaasut ima nassuiarpai,

-Tassa illoqarfitsinni inuit 30-40 suliffissaaleqipput, kisitsisinngorlugu 16 procentit missaaniipput, tamannalu sinerissami illoqarfinnut allanut sanilliullugu annertungaatsiarpoq, borgmester Erling Madsen oqarpoq.

Illoqqortoormiut Borgmesteriata Erling Madsenip pissutsit naalakkersuisoqarfimmut nalunaarutigisarsimavai.

-Ingammik piniartortatta tunitsivissaqannginnerat ajornartorsiutaanginnassappat, taava kommune aningaasaqarniarnermigut assut ilungersunartumik ukiup sinnerani inissisimajumaartoq, aningaasanik immikkut piniartunut ikiorsiissutissanik immikkoortitsinikuunnginnatta, Erling Madsen oqarpoq. Taanna Inatsisartut Ilaqutariinnermut Ataatsimiitsitaliaata ilaasortai Illoqartoormiunut paasisassarsiortut assut iluaqutigilluarnissaanut neriuuteqarpoq.

- Sapinngisannguarput tamaat kommunitta tungaaniit tamanna iluaqutiginiarsarissavarput, aamma sapinngisannguarput tamaat atorlugu kommunitta ajornartorsiutai tamaasa saqqummiunniarsarissavagut, neriutigalugu paasisassarsiorlutik angalanerminni iluaqutigiumaaraat, uterunillu naalakkersuisunut susassaqartunut tamanut ingerlateqqikkumaaraat.

Erling Madsen-ip inuussutissarsiornikkut ajornartorsiutit piniartullu atugarisaat pingaartillugit paasisassarsiortunut erseqqissaaniarpoq, taakkualu aaqqinneqarnissaat neriuutigaa.

-Ukiuni marlunngulersuni naalakkersuisoqarfinnut assigiinngitsunut saqqummiuttareernikuuakka, kisianni massakkumut ajoraluartumik kinguneqanngilaq, taamaammat neriuppunga paasisassarsiortut qanimut paasisaqarunik, uterunik annerusumik iliuuseqarniarsariumaartut, ilaatigummi maanngaanniit taamatut ilungersoraluarluni, kaaviinnartutut misigisimaleraanni ikiortissaaleqinartaqaaq, Illoqqortoormiuni Borgmesteri Erling Madsen oqarpoq