Illoqqortoormiormiut Quadra Mining isumalluarfigaat

Illoqqortoormiut avannaanni aatsitassamik Molybdænimik piiaanissamik pilersaruteqarnernermut Illoqqortoormiormiut isumalluaqaat. Quadra Miningip Illoqqortoormiut avannaanni molydænimik piiaanissamik qinnuteqaataa aappaagu akuerineqassasoq ilimagineqarpoq, suliffeqarfissuullu sinniisai marluk aatsitasssanut pisortaqarfimmeersunik ilaqarlutik innuttaasunik ippassaq ataatsimiisitsipput, innutaasut 14 procentiisa najuuffigisaannik.
Allattoq Jens Thorin
aggustip 19-at 2008 14:02

Borgmester Eling Madsen oqarpoq, kommunimi piniarnikkut inuussutissarsiorneq ajornarsiartormat, inuttaasut isertitaqarluaqqilernissamik maanna isumallualersut.

- Sapinngisartik tamaat nunaqavissut atorniarlugit, Quadra Miningimeersut oqarput. Aatsitassanilli piiaanissammut ilinniarnissaq pisariaqarmat, Sisimiuni aappaagu 2009-miit aatsitassarsiornermik ilinniarfik aallartippat, innuttaasut tassani iliniaqqullugit kajumissaarneqarput, borgmesteri oqarpoq.

Ukiuni kingullerni arlaqalersuni Illoqqortoormiuni piniartuuniarneq ilungersunarsiartorsimavoq, piniagassat assigiinngitsut killilersorneqarlutik. Natsit amii kisimik tunisaapput taakkualu akii inuussutiginiarlugit ilungersunaqisut, borgmesteri oqarpoq.

- Tamannarpiaq pequtigalugu ilimagaara, piniartut ilai piiaavimmi sulilernissamut piareersimasut. 80’kkut qiteqqunneranni Amerikamiut Arco kommunitsinni uuliamik qillerillutik ukiuni tallimani misissuipput, taamanilu maanimiut amerlasuut suleqataapput aningaasarsilluaatigisaminnik. Taamaammat isumalluaqaagut, Illoqqortoormiut borgmesteriat oqarpoq.

Pinngortitamut tunngasut qulakkiigassat, qulaajarneqartut innuttaasunit misigisimaneqartoq, Erling Madsen aamma oqarpoq.

Aatsitassarsiorneq pillugu innuttaasunik ataatsimiisitsineq Illoqqortoormiormiut 70-it missaanniittut peqataaffigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq