Illoqarfiup qeqqa inuaqerpalaalerpoq

Illoqarfiup qeqqani maanna inuaqerpalaaq tusaaneqarsinnaalerpoq Sammisassaqartitsivimmik suliniuteqartut sapaatip akunnerata naanerani meeqqanut mikinerusunut pinnguartarfinnik ikkussuisitsinereernerisa kingorna:

- Tassa massakkut meeqqat mikinerusut pinnguartarfissaat suliarivarput. Taava meeqqanut anginerusunut inuusuttunullu pinnguartarfiit tullinnguuttussaapput. Taakkualu aallartisarlugit massakkut ingerlappagut, Palle Jeremiassen, Sammisassaqartitsivimmik pilersitsinissamut isumassarsisoq, taama oqarpoq.

Sammisassaqartitsivik aningaasaateqarfinnit Ilulissanilu suliffeqarfinnit assigiinngitsunit maannamut 300.000 koruuninik tapiiffigineqareerpoq.

Sammisassaqartitsivimmik suliaqartut sapaatip akunnerata naanerani meeqqanut inuusuttuaqqanullu qallorfiusinnaasut aamma ikkussuunniarpaat:

- Taava ulluinnarni piffissarput aamma malillugu ikkussuisartussaavugut. Aamma piumasoqaruni takanna saaffiginnissinnaapput ullukkulluunniit ikkussuerusukkunik atortulersinnaassuagut, Palle Jeremiassen oqarpoq.

Suliniullu Sammisassaqartitsivik, maannamut iluatsilluarluni ingerlasoq, tamaannga unissanngikkallarpoq. Suliniuteqartummi aningaasanik katersuiniarlutik Ilulissat Timersortarfiani aggustip 30-ani tusarnaartitsiniarput.

Tusarnaartitsinissami nipilersortuussapput Asuki, Siissisoq aamma Zikaza.