Illoqarfinni tallimani ilinniartut ineqarfiinik 16-inik sanaartortoqassasoq
Aasianni, Ilulissani, Nuummi, Qaqortumi Sisimiunilu ilinniartut ineqarfii katillugit 16-it ukiut tallimat qaangiuppata sananeqareersimassapput.
Ilinniartitaanermut, Kultureqarnermut Ilageeqarnermullu Naalakkersuisoqarfik tusagassiuutinut nalunaarummi allappoq.
Ilinniartut ineqarfissaasa sanaartornerat 2025-mi naammasissisimassapput, taakkulu 508-nut inissaqartitsissallutik.
- Ilinniartortatta inissamik ajornanngitsumik pissarsisarnissaat pingaaruteqarpoq, taamaasiornikkut ilinniarnissartik nukissaqarfigalugulu aallussinnaaniassammassuk, ilinniartitaanermut, kultureqarnermut, ilageeqarnermullu naalakkersuisoq, Ane Lone Bagger nalunaarummi oqarpoq.
AAMMA ATUARUK Naalakkersuisut: Ilinniartut ineqarfii tamarmik ikuallattuulernermut kalerrisaaruteqassapput
Ilinniartunut inissiat angissusaat ilusaallu assigiinngitsuussapput. Inissiat ilaanni ilinniartut ineeqqami ataatsimi marlukkaartussaassapput ataatsimoortumillu iggaveqarlutillu errorsisarfeqassallutik.
Inuusuttut ineqatigiiaarnermikkut ulluinnarni imminnut ikioqatigiillutillu tapersersoqatigiinnissaat qulakkeerneqassasoq, Ane Lone Baggerip erseqqissaatigaa.
- Neriuppunga inissiat pitsanngorsaaffiginerisigut ilinniartut naammassisartut amerlisinnaassasut ilinniartullu ilinniakkaminnik taamaatitsiinnartartut ikilisinneqarsinnaassasut, taanna oqarpoq.
Namminersorlutik Oqartussat sanaartortitsissasut
Namminersorlutik Oqartussat sanaartortitsisuussapput. Tamanna akikinnerpaasutut aaqqiissutaasoq, nalunaarummi allassimavoq.
Ilinniartunut inissiat amigaataanerisa iliuuseqarfigineqarnissaat Naalakkersuisunit Inatsisartuniillu piffissami sivisuumi kissaatigineqarpoq.
- Suliassaq suli naammassinngilaq aningaasaqarnikkummi nammineq pilersorsinnaalernissaq angussagutsigu ilinniartitaanermut tunngatillugu suli suliassaqaqaaq, Ane Lone Bagger oqarpoq, nangillunilu:
- Taamaattorli oqarsinnaalerpugut inuusuttortatta ilinnialernissaanut sinaakkutissat Naalakkersuisunit qulakkeerneqartut. Tullinnguupporlu inuusuttortatta namminneq nunattalu iluaqutigiligassaanik ilinniagaqalernissamik ilungersuuteqalernissaat.