Illoqarfiit ukiuusartut silaannarmik aamma mingutitseqataapput

Illoqarfiit ukiuusartut aqqanillit borgmesteriisa 13-inissaannik ataatsimersuarnerat ualimut naammassineqarpoq. Ataatsimeersuaqataasut ikumatitalerlutik katersortarfimmiit Katuamut ingerlaaqatigiillutik ataatsimeersuarnertik naggaserpaat
Allattoq Jaaku Lyberth
januaarip 20-at 2008 16:46

Ataatsimeersuarneq nalunaarusiornermik atsioqatigiiffiuvoq. Nunarsuarmi illoqarfinni ukiortartuni borgmesterit suleqatigiiffiani peqataasut nalunaarusiornerminni nassuerutigaat, silaannaap kiatsikkiartornerata kingunerisaanik ajornartorsiutit qaangerneqarnissaanut pisussaaffeqarnertik, suliniuteqarnermilu siuttuunissamut peqataaniarlutik.

Illoqarfiit ukiuusartut borgmesteriisa ataatsimiinnertik naggaserlugu nalunaarusiornerminni nassuerutigaat namminneq aamma silaannarmik CO2mik mingutitseqataagamik, tassami issittumi illoqarfinni najugaqartut kiassarniarnerannut nukissiuutinik atuineq annertummat taamatullu aputaajaaneq annertulluni.

Nalunaarusiaq Nuuk Deklaration 2008 Nuuk kommuneani borgmesterimit Nikolaj Heinrich imit Japanimilu illoqarfimmi Sapporo-imi Borgmeserimit Fumio Ueda-mit ullup qeqqqata siorna atsiorneqarpoq.

Nalunaarusiamik atsioqatigiinnerup saniatigut komite-mik pilersitsisoqarpoq. Komitep taaasumi suliassaraa, illoqarfinni ukiuusartuni suliniaqatigiiffimmi ilaasortaasut, avatangiisimik mingutsinnginnissamik suliniuteqarnerat malinnaavigineqassallugu. Komite taanna Alaskami illoqarfimi Anchorage-mi allaffeqassaq. Nunarsuarmi illoqarfinni ukiuusartuni borgmesterit suleqatigiiffiat World Winter Cities tulliani ataatsimeersuassaaq, Canadami illoqarfimmi Prince George-mi ukioq 2010-imi

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq