Illoqarfiit nutsernissamut piareersimanngitsut immikkut ilisimasalik isumaqarpoq

Demokraatineersup Palle Christiansenip siunnersuutigisaatut, nunaqarfiit 100-t ataallugit inoqartut matuneqassappata, illoqarfiit nutserfiusussat atugarissaarnikkut tunniussasatigut piareersimanngillat. Nunaqarfinniik nutsertitsisimanerup kinguneranik misissuisimasoq, Steen Jeppson, taama isumaqarpoq.
Allattoq Jens Thorin
marsip 23-at 2009 16:20

- Nalilersortariaqarparput, aningaasaqarnikkuinnaq ineriartortitsisoqassanersoq inuilluunnit ilinniartitaanikkut piginnaasaasigullu ineriartornissaat pingaartissaneripput. Nunaqarfimmiut avinngarusimasullu 50-ikkunni 60-ikkunnilu puigugaasimapput, tupinnanngilarlu katataasimammata, Steen Jeppson oqarpoq.

- Nunaqarfimmiut avinngarusimasuneersullu 12.000-it missaanniipput. Ilumut taakkua pilliutigineqassappat? Qallunaat 50-ikunni, 60-ikkuni allaallu 30-ikkunni eqqartorpaat akikinnerussasoq, inuit illoqarfissuarnut sisamanut nutserpata, Steen Jeppson oqarpoq.

Pitsaanerunngila, inuit illoqarfinni atugarissaarnikkut aaqqissuussaalluarnerusuni najugaqarunik, taamaalillutillu aningaasaqarnerput oqinnerulersillugu?

- Isuma taanna paasilluarsinnaavara. Eqqaamasariaqarporli, inuit illoqarfissuarnut nuunnissaat pilersaarusiorneqaqqaartussaapput. Atugarisassaat naammappat, soorlu ineqarnissaat, suliffissaat meeqqeriviit allallu eqqarsaatigalugit? Nuummi ersereerpoq, inissaqarniarnikkut ajornartorsiuteqartorujussuuvugut. Matumani pilersaarusiorluarnissaq qitiulluinnarpoq, immikkut ilisimasalik oqarpoq.

- Nunaqarfimmiut nutsileraluarpata, immaqa oqaluttuarisaaneq uteqqissavarput, katataasoqarluni, taavalu pigissaarnerusut ilinniarsimanerusullu assigiinngisusiaq annerulerluni, Kulturimik Inuiaqatigiit oqaluttuarisaanerannik ilisimatuussutsikkut ilinniagartuunngorlaaq, Steen Jeppson, oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq