Illissap paavatigut kræftimut akiuussutissaq innersuussutigineqartoq
Akiuussutissamik kapisisalernikkut illissap paavatigut kræftimik toqquteqartartut ukiut 20 qaangiuppata 100-nik ikinnerulissagaluarput, peqqussutsimut aqutsisoqarfimmi pisortaq nakorsaaneq Else Smidt taamatut naliliivoq.
Danskit peqqissutsimut naalakkersuisuata Lars Løkke Rasmussenip akiuussutissap akisoqisup atorneqalernissaanut aningaasanik ujaarlerniarluni polikkerinillu isumaqatiginniarluni neriorsuisimavoq.
Arnat inuusuttut 12.000-it nammineq akilikkaminnik akiuussutissamik kapitissimapput. Nammineq akilerlugu akiuussutissamik kapitisinnaaneq piffissami sivisuumi periarfissaasimavoq.
Akissaqartut kisimik periarfissaqartitaanerat Socialdemokratinit Radikalinillu isornartorsiorneqartarpoq, peqqissutsimullu naalakkersuisoq Lars Løkke Rasmussen suliamut kigaalaarnerarlugu isornartorsiorneqartarluni.
Niviarsiaqqat aqqaneq marlunnik ukiullit qaqugu akiuusutissamik kapitinneqartalissanersut suli ilisimaneqanngilaq.
Inatsisartuni ilaasortap Asii Chemnitz Narupip, upernaaru inatsisartut ataatsimiilerpata, illissap paavatigut kræfteqalernissamut akiuussutissap Kalaallit Nunaanni atorneqalernissaa siunnersuutigissamaarpaa.
