Illersuisoq: Unnerluutiginnittoqarsimasariaqanngikkaluarpoq

Tasiilami politeeqarfiup pisortaa, Kristian Síngertaat, suliaminik sumiginnaasimanngitsoq, Tasiilami eqqartuussivik ippassaq aalajangiivoq.

- Suliamilli sumiginnaasimasutut unnerluutiginnittoqartariaqarsimanngikkaluarpoq, Danmarkimi Politiit Kattuffiata eqqartuussisuserisua, Torben Koch, oqarpoq.

- Dansk Politiforbund sinnerlugu 1994-imi eqqartuuussisuserisuuleramali sulianut pineqartunut assingusunut suliassinneqarsimanngisaannarpunga, Torben Koch oqarpoq, nangillunilu:

- Ajornartorsiutaasinnaasut taama aaqqiiviginiarneq ajorpavut. Uani aporaatitsiniarsarisoqarsoraara, oqaloqatigiinneq atornagu, Torben Koch isumaqarpoq.

Tasiilami politiit pisortaata, Kristian Síngertâp, suliaminik sumiginnaasimasutut sapaatip-akunnerani matumani eqqartuunneqarnerani, Torben Koch illersuisuuvoq.

Qaqortumi politiit pisortaat, Bent Ole Kleist, assinganik unnerluutigineqarmat, Torben Koch aamma illersuisuuvoq. Bent Ole Kleist Qaqortup eqqartuussivianit pinngitsuutinneqarpoq.

Suliat taakku marluk nunatta politimesterisimasaata Anders Linnetip suliassanngortitarisimavai. Torben Kochilli oqaasii malillugit, suliassanngortinneqarnissaat pisariaqarsimanngikkaluarpoq.

- Kalaallit Nunaanni pissutsit allaapput, pisariaqassappallu Kristian Síngertâp aalakoortut isertitsivianni inimut matu ammatissinnaavaa. Isumaga malillugu isertitsivimmi pissutsit atuuttut naammaginanngillat, Torben Koch naggasiivoq.

Tasiilami eqqartuussivimmut suliassanngortitsinerup inernera ingerlateqqissanerlugu maanna politimesteriusup, Steen Thomsenip, sapaatit akunnerini marlunni eqqarsaqqiffissaqartippaa.