Illersuisoq: Oqaatsit eqqartuussivimmi missukutaapput

Kalaallit pinerlussimasut eqqartuunneqarneranni eqqartuussissutissap allagartaata kalaallisut nutserneqartannginnera pillugu Nunatsinni Eqaartuussivimmi illersuisup, Josef Petersenip Nunatta Eqqartuussisuunerata, Søren Søndergård Hansenip uparuaassutai taperserlugit oqarpoq. Eqqartuunneqarnermi eqqatuussissutip allagartaa pinngitsoorani kalaallisut nutserneqartariaqartoq unnerpaa, taamaattoqanngippat eqqartuunneqartup ajortuliarisimasai sinnerlugit eqqartuussisoqarsinnaammat.
Allattoq Apollo Jeremiassen
maajip 27-at 2011 12:18

- Ajornartorsiut tamanna sulinitsinni naammattoortuartarparput. Taamaattumik isumaqarpunga eqqartuussissut unnerluunneqartup oqaasii atorlugit saqqummiunneqartariaqartoq, Josef Petersen KNRimut oqarpoq

Oqaatsit ataasiakkaat aalajangiisorujussuussinnaapput eqqartuussisoqartillugu. Tamanna pineqaatissiissutip sivisussusaanut sunniuteqaratarsinnaavoq.

- Unnerluunneqartoq piliarisimanngisani pillugu nassuersinnaavoq. Ajornerpaaffiani pineqaatissinneqarnera sakkortunuleruleratarsinnaavoq, Josef Petersen oqarpoq ilanngullugugulu oqaatigaa unnerluunneqartut pisuunerarsinnaasut naak suna pineqartoq paaserpianngikkaluarlugu.

- Naammattoortarparput unnerluunneqartut angiinnartut naak paasinngikkaluarlugu suna pineqarnersoq.

Højesteretimi aalajangiinermi erserpoq, kalaallit marluinnik oqaasillit pisinnaatitaaffiginngikkaat unnerluussissutip kalaallisuumut nutsertinnissaanut, taamaammat ilaatigut oqaasiinnartigut ilisimatitsisoqartarpoq unnerluussissutip imarisaanik.

Josef Petersen nunatsinni eqqartuussisuuneq Søren Søndergård Hansen assigalugu isumaqarpoq, eqqartuussiveqarnerup tutsuiginassusaanut tamanna innarliisinnaasoq. Taamaammat unnerluunneqartup oqaasii atorlugit unnerluussissut allanneqartariaqartoq isumaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq