Illersuiniaqatigiiffiit aatsitassarsiornermut inatsisissatut siunnersuut isornartorsiorpaat
Inatsisip allannguuteqarneratigut paasissutissanik takunnissinnaatitaaneq killilerneqassaaq immikkullu naammagittaalliorsinnaanermut periarifissaq atorunnaarsinneqassalluni.
Avatangiisinik illersuiniaqatigiiffiit sisamat tassaasut Avataq, Noah, Det Økologiske Råd aamma nukissiuutit ataavartut atorneqarnissaannik suliniaqatigiiffik VedvarendeEnergi Kalaallit Nunaanni uran pillugu oqallinnermi peqataasarput.
Taakkua ataatsimoorlutik tusagassiuutinut nalunaaruteqarlutik isornartorsiuteqarput, inatsisip allanngortinneqarneratigut innuttaasut pisinnaatitaafii akornuserneqartut oqarlutik.
Aatsitassanut inatsisip allannguutissaa inatsisartut tulliani ataatsimiinneranni oqaluserineqasaaaq.
- Aaalajangerneq taanna akerleriiffiusoq, Aarhusimi isumaqatigiissummut Aarhus konvensionemut naapertuutinngilaq, isumaqatigiissummi tassani innuttaasut avatangiisit pillugit paasissutissanik pissarsisinnaanerannik periarfissinneqarput alaajangiinissallu sioqqullugit peqataatinneqartarlutik taamatullu eqqartuussisutigut suliassanngortitsinnaapput naammagittaalliorsinnaatitaalllutillu, avatangiisinik illersuiniaqatigiiffiit taama allapput.
- Uranimut naaggaarluinnarnerup atorunnarsinneqarnera kalaallit danskillu politikeriisa illersorlugu oqarput, Kalallit Nunaanni uranimik piianiarnermi avatangiisit illersorneqarnissaannut piumasaqaataasut nunarsuarmi qaffasinnerpaasuusut.
Aarhusimi isumaqatgiissutip malittarisassaanik Naalakkersuisut eqquutitsinngippata tamanna tatiginanngitsoq , Mikkel Myrup Kalaallit Nunanni avatangiisinut illersuiniaqatigiiffimmi Avataq meersoq oqarpoq.
Aarhus-imi isumaqatgiissut Aarhus Konventionen 1998-imi Danmarkimi atsiorneqarpoq, tassani innuttaasut avatangiisit pillugit paasissutissanik pissarsisinnaanerannik aalajanngiinerillu sioqqullugit peqataatinneqarnerannik periarfissinneqarput kiisalu naammagittaallliorsinnaatitaallutik.
Paasissutissanik takunnissinnaatitaanerup killilersorneqarneranut Naalakkersuisut tunngavilersuutaat tassavoq allakkiat paasissutissat suli naammassineqanngitsut - Aatsitassaqarnermut naalakkersuisoqarfiup aamma Avatangiisinut Pinngortitamullu Naalakkersuisoqarfiup akornanni oqaloqatigiissutineqarnissaat pisariaqartinneqarsinnaammat.
Immikkut ittumik naammagittaaliorsinnaanermut periarfissaq atorneqarnikuunngilaq taannalu atorunnaarsinneqarpat Aatsitassanut Naalakkersuisoqarfiup Naalakkersuisoqarfiit assigilissagai, inatsiseqarnermut immikkoortortami chefkonsulenti KNR-imut nassuiaatigisimavaa.
