Trine Bramsenip illersornissaqarfiup nunatsinni suliaqarfiinut pulaassaaq ministeriutullu nunatsinni tikeraarngaalerpoq.Assi: Scanpix

Illersornissamut ministerip Trine Bramsenip nunarput aqagu tikeraassagaa

Illersornissamut ministerip nunarput decembarimi tikeraartussaanikuugaluarpaa, tikeraarnissaali taamaatiinnarneqarpoq.

Trine Bramsenip nunarput kingullermik decembarimi tikeraartussaanikuugaluarpaa. Illersornissamulli ministereqarfiup illutaanik aqutsisoqarfimmi peqquserluttuliortoqarnerata kingunerisaanik tikeraarnissaa tamaatiinnarneqarpoq.

Trine Bramsenip danskit sakkutuut tikeraartussaagaluarpai kalaallillu politikerii oqaloqatigalugit.

Illersornissamut ministerip naalagaaffeqatigiit avannarlerpaanut aqagu tikinnissaa ilimanarluinnarpoq. Taassuma angalanissaanut pilersaarut decembarimi angalanissamut pilersaarutigisaanut assingulluinnarpoq.

Tassa Illersornissaqarfiup nunatsinni suliaqarfiinut pulaassaaq Trine Bramsenilu ministeriutut nunatsinni tikeraarngaalerpoq.

AAMMA ATUARUK Peqquserluttuliortoqarnerata paasineqarnerata kingorna: Illersornissamut ministerip nunatsinnukarnissani kinguartippaa

Ministeri Kangerlussuarmut tikikkuni Issittumi Sakkutooqarfiup ataani timmisartortartut sisamanngornermi ullaakkut pulaariarlugu Nuummut ingerlaqqissalluni.

Trine Bramsenip attaveqatigiinnermut naalakkersuisoq, Karl Frederik Danielsen (Siumut) aamma nunanut allanut tunngasunut naalakkersuisoq Steen Lynge (D) illoqarfiit pingaarnersaanni ataatsimeeqatigissavai.

Tamatuma kingorna Issittumi Sakkutooqarfimmut, sakkutuujusimasut caféannullu pulaassaaq, kingornalu Interforcep nunatsinni allattoqarfia ammassallugu. Allattoqarfiup nammineq kajumissutsiminnik upalungaarsimanermik suliaqartut suliffeqarfiillu taakku atorfigisaasa pitsanngorsarnissaat sulissutigissavai.

Kalaallit amerlanerusut Issittumut soqutiginnittoqarnerunerani illersornissaqarfimmi upalungaarsimanermilu ilaalernissaat angorusunneqarpoq.

Illersornissamut ministerip umiarsuaq alapernaarsuut, Ejnar Mikkelsen aamma pulaassavaa.

Ministeri aqaguagu tallimanngornermi ullaakkut aallaqqissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat