Illersornissamut ministerip qulimiguullit isornartorniorneqarsimaqisut illersorpai

Illersornissaqarfiup qulimiguulii nutaat Seahawkit imaani puttasinnaanngillat. Tamannalu Issittumi sulinermi assut aarlerinartoqarpoq. Sakkutuut imarsiortut qulimiguuliini aqutsisuni tullersortaasimasoq ukiut pingasut matuma siorna pensionersimasoq Stanley Sørensen taama oqarpoq.

- Isumaqarpunga tamanna isornartoqartoq, qulimiguullimmi taama ittut sumiiffinni imaanilu ulorianartuni nunami isorartoqisumi atorneqartussaapput. Imaq nilleqaaq, silalu ajortarluni. Taama ittuniitilluni qulimiguulimmik ajornartorsiorluni mittariaqalersilluni annannissamut periarfissaqarpallaanngilaq, qulimiguulimmi taanna ingerlaannaq kivisinnaavoq pusissinnaallunilu, Stanley Sørensen oqarpoq.

Taama isornartorsiuteqarneq SF-it Socialdemokratiillu taperserpaat. Taamaattumik illersornissamut ministeri Claus Hjort Folketingimi sisamanngornermi isumasioqatigineqarpoq.

Taassuma ataatsimiinnermi Seahawkit isumannaatsuunerat illersorpaa:

- Qulimiguullit umiarsuarniitittakkat MH60R Seahawk 2011-mi '12-imilu nalilersuinermi isumannaatsupilussuartut nalilerneqarput. Qulimiguulimmillu naliliineq taanna suli qaffasittupilussuuvoq.

Claus Hjort naapertorlugu qulimiguullip isumannaassusaa suli qaffasippoq, qulimiguullimmi  isumannaallisaatinik immikkut ikkussuiffigineqarsimapput. 

- Aamma taaneqarsinnaavoq annanniut inuttamut ataatsimut immikkoortoq ineriartortinneqartoq, immikkut igalaamik qimaaffissiamik ikkussisoqartoq, ajornartorsiornermi ikittakkat annanniullu angisooq nassarneqarsinnaasoq.

Tamakkuli Stanley Sørensenip aaqqiissutitut isiginngilai.

- Inuttat ilinniarluarsimasuupput. Immap iluani annaassiniarsinnaasutut sungiusarneqartarput. Ilaasutulli angalasuusinnaasut isumannarnerupput. Qulimiguulik kiviartoraluarpat ilaasut taartillugu mallertillugulu qulimiguuliup qimannissaanut ikiorneqartariaqassappata.

Qulimiguullit Seahawkit pingasut siulliit danskit illersornissaqarfianut aasaq tunniunneqarput. Sinneri 2018-imi tunniunneqassallutik.

Ilimagineqarpoq Issittumiittussat upernaamut atorneqalernissaat. Qulimiguullit katillutik 4 millard koruunit missaanni akeqassangatinneqarput.