Illersornissamut aningaasartuutit ikinnerusut mssingersuutaapput
Taamaattumik kalaallit qallunaallu soqutigisaat naammassiniarlugit umiarsuarnik imaluunniit timmisartunik nutaanik pisinissamut akissaqartoqarnavianngilaq, matumani naak avatangiisinut aamma annaassiniartarnernut piumasaqaatit annertusiartoraluartut, Socialdemokraatit aningaasaqarnermut oqaaseqartartuat aamma folketingip illersornissamut ataatsimiititaliaani ilaasortaq John Dyrby Paulsen aviisimut Berlingskemut ullumi taama erseqqissaavoq.
Tamatumunnga peqatigitillugu nunat issittumiittut pineqartunut aningaasartuutiminnik qaffakkiartortitsileruttortut oqaatigineqarpoq:
Ruslandip juunimi nalunaarutigaa, Issittumi sakkutooqatigiinnik marlunnik, tamarmik immikkut 5.000-iusunik pilersitsiniarluni, matumani sinerissap 7.000 kilometerinik isorartussusillip nakkutigineqarnissaa pineqarluni.
Norgep illersornissamut aningaasartuutissatut missingersuutini aappaagumiit 672 millionit koruuninik qaffanniarpai, aningaasat timmisartunik umiarsuarnillu nakkutilliissutinik nutarterinermut atorneqassasut, Norgemilu illersornissamut ministerip oqaatigaa.
Aamma Canadap Issittumi nakkutilliinermut atugassaminik angallatinik 28-nik, immami sikulimmi angalanissamut naleqqussakkanik sanatitsinissamik, sapaatip akunnerata siuliani isumaqatigiissuteqarpoq.
- Danmarkip Issittumi peqataanngippallaarnera, Kalaallit Nunaata avannaani imartamik, matumani Qalasersuaq ilanngullugu, piumasaqaateqarnissamut sanngiinnerulersitsisinnaavoq, taama oqarpoq Johannes Riber Nordby, sakkutuut umiarsuaanni naalagaq aamma DIIS-imi sakkutooqarnikkut immikkut ilisimasaqartuusoq.
- Tamatuma assigaa, nunap ilaani nunap immikkoortuani marloriaammik annertussusilimmi politiit biilii amerlisinnagit nakkutilliineq, taanna aviisimut Berlingskemut taama oqarpoq.
