Illerfik imaqanngitsoq ilineqartoq: Alianartumik kukkusoqarpoq

Angut Nanortalimmi siorna aggustip qaammataani toquvoq. Angutip septembarip qaammataani ilisaanissaa oqaluffiup allaffianut isumaqatigiissutigineqarpoq.

Ilisisoqarpoq, qaammatilli aappaata affaata kingornatigut toqungasoq illerfimmut ilineqarsimanngitsoq paasineqarpoq.

Illerfik assallugu qaqinneqaqqippoq, angullu ullormi tassani eqqortumik ilineqarluni.

Qanigisaasut kinaassutsiminnik isertuusserusupput, taakkunanngali ataatsip suliaq piffissami sivisuumi eqqarsaataasimasoq oqaluttuaraa.

Oqartussat pingasut ilisinermut atatillugu akuusut

Kommune Kujalliup teknikkeqarnermut avatangiisinullu ingerlatsiviani pisortap, Mike Kristiansenip oqarnera naapertorlugu oqartussat pingasut akornanni kukkusoqarsimavoq.

Oqartussat pingasut ilisinermik isumaginnittut tassaapput kommuni, peqqinnissaqarfik palaseqarfiullu allaffia.

Toqusoqaraangat toqusup timaa nakorsamit misissorneqartarpoq. Nakorsap toqussutaasoq misissortarpaa, tamatuma kingorna toqusup allagartaa illoqarfiusumi oqaluffiup allaffianut tunniunneqartarpoq.

Oqaluffiup allaffiata toqusup allagartaa tigugaangamiuk oqartussat allat toqusoqarneranik nalunaarfigisarpai. Taakku tassaasinnaapput politiit kommuniluunniit.

Toqusup timaa toqusut inaanniittarpoq. Kommunilli teknikkeqarnermut ingerlatsiviata toqusup iliveqarfiliaanneqarnissaa isumagisarpaa.

Tassanilu peqqinnissaqarfiup kommunillu sulisuisa akornanni attaveqatigiinnermi ajutoortoqarsimavoq.

Kommune Kujalleq misissuisoq

Kommunip kukkusoqarnera akisussaaffigigaa oqaatigineqarsinnaava?

- Oqartussat pingasut akornanni alianartumik kukkusoqarsimasoq oqaatigerusuppara.

Kommune Kujallermi teknikkeqarnermut avatangiisinullu ingerlatsivimmi pisortaq, Mike Kristiansen oqarpoq.

- Susoqarsimanera tamatuma peqqinnginnissaa pillugu ingerlatseriaaserput misissorparput,

- Kommune Kujallermi ilisisoqarneranut ingerlatseriaaserput misissorparput, tamannalu illoqarfimmiit illoqarfimmut assigiinngitsoq paasivarput. Taakku biskoppeqarfik peqatigalugu inissitsitileruttorpagut.

- Kia qanoq iliortarnissaa pillugu malittarisassanik ersarissunik peqalernissaa naatsorsuutigaarput.

Toqusup timaata illerfimmut ilineqarnissaanut ilaqutaasunik nalinginnaasumik najuuttoqartarpoq. Qanigisaasulli Nanortalimmi peqqinnissaqarfimmi sulisut toqusup timaanik illerfimmut ilisinissaanut ilaqutaasunik najuuttoqanngilaq.

Ilisinermit qaammatit appaata affaata kingorna inummik allamik ilisisoqartussanngormat kukkusoqarnera paasineqarpoq. Tassa angut toqungasoq suli inimi nillataartitsivimmiittoq paasineqarpoq.

- Taamaammat tassani arlaatigut kukkusoqarsimavoq, Mike Kristiansen oqarpoq.

- Biskopeeqarfik politiillu attavigineqarput. Tamatuma kingorna illerfiup qaqinneqaqqinnissaanut akuersissuteqartoqarpoq – oqartussallu tassani najuupput. Pineqartup ulloq taanna ilineqarnissaa biskoppeqarfiup aalajangerpaa, Mike Kristiansen.

- Alianartumik kukkusoqarpoq, taamaattoqaqqissanngilarlu.