"Iliveq" filmiliarineqalerpoq

Filmimi inuusuttut arfinillit sammineqarput, taakku illuaqqamiinnerminni eqqumiitsunik misigisaqaqattaarput.

Filmiliorneq Nuup Kangerluani ingerlanneqarneruvoq, Nuummiit akunnerup affaani angallammik orninneqarsinnaasumi, filmiliortullu manna tikillugu silagissioqaat.

Filmimi kalaallisuinnaq oqalupput, naak inuttaasut ilaat kalaallisut paasineq ajoraluartut.

Kalaallisut paasisinnaanngitsut marluk oqaluttuarput tamanna ajornartorsiutaanngitsoq.

- Kalaallisut sapaatip akunnerata ingerlanerinnaani ilikkagaqarluarpunga, Paalo Bisgaard Nunatsinni inunngorlunilu alliartorsimasoq, kalaallisulli oqalunnermik iluamik ilikkagaqarsimanngitsoq, oqarpoq.

Islandimiu Freyr Lindal Sævarson isumaqataalluinnarpoq.

- Oqaatsit amerlanerit oqalussinnaasaat atussallugit pissusissamisoortoq isumaqarpunga, soorlu Islandimi taamaattartugut. Taamaammat kalaallisuinnangajak oqaluttoqarnera ajorinngilara, Freyr Lindal Sævarson oqarpoq.

Filmip immiunneqarnerata aallartilluarnera ilitsersuisup, Malik Kleistip, nuannaarutigaa.