Ilitsoqqussaralugu oqaatsit ulluat Oqaasileriffiup malunnartissavaa

Unescop Ilitsoqqussaralugu Oqaatsit Ulluannut atatillugu ukioq manna qulequtsiussaa tassaavoq 'Ilinniartitaaneq pitsaasoq, ilinniartitsinermi oqaatsit kiisalu ilikkakkat kinguneri'.

Unnuk assigiinngitsunik pisoqarfiussaaq, tikilluaqqusisoqareerpat Unescop generalsekretæriata Irina Bokovap ullormi oqalugiaataa atuarneqassaaq oqaatsinillu allanartunik saqqummiisoqassalluni, ilaatigut russit, japanimiut, kroatiamiut, portugiit, islandimiut tunumiullu oqaasiinik saqqummiussisoqassalluni. Aammattaaq kalaallisut allagaatinik katersivik korpus pillugu Oqaasileriffimmit saqqummiussisoqassaaq.  

Oqaatsinik allanartunik saqqummiussineq aallarnerlugu Avanersuarmiup Tukummeq Qaavigap sumiorpaluutini atorlugit Inuit qulliat ikissavaa.

Aaqqissuussineq Oqaasileriffiup Nunattalu Atuagaateqarfiata aaqqissugaat Nuup Bussiinit tapersersorneqarpoq. Bussi akeqanngitsumik ilaaffigineqarsinnaasoq Qinngutsinni Suloqqamit aallassaaq nalunaaqutaq 18.30, illoqarfikkoorluni kommunip allaffiata eqqaatigooriarluni Ilimmarfiliassalluni, aaqqissuussinerlu nalunaaqutaq 21.15 naammassippat Ilimmarfimmit aamma bussiussisoqaqqissaaq.