Ilitsersuisartoq aqqutissiuussivoq
Isiginnaagassiaq sakkortooq 'Oqarit inuullutillu' isiginnaartitsisartunit sinerissami illoqarfinni arfineq pingasuni siorna takuteqattaarneqarnera pillugu filmiliamik angallassilluni Pipaluk K. Jørgensenip suliniummik ataqatigiissaarisoq Nina Jacobsen angalaqatigaa.
Isiginnaartitsissut 'Oqarit inuullutillu' kinguaassiuutitigut atornerluisarneq imminullu toquttarneq pillugit piviusulersaarutaavoq, taakkulu filmertitsereernerup kingornagut oqallisigineqarluartarput.
- Aallarniutigalugu filmi Aasianni arfininngormat takutipparput, aqaguanilu ilinniarnertuunngornianut oqallisigitillugu. Apeqqutit amerlaqaat, aamma inooqatigiinnermut tunngasunik imminullu toquttarnerup iliuuseqarfiginissaanut inuusuttut namminneerlutik kulturimik, isiginnaartitsinermik imaluunniit filmimik suliaqarsinnaanerannik kajumissaarneqarput, Pipaluk K. Jørgensen oqarpoq.
Angalaqatigiit taakku Paamiunut maanna anngussimalerput, tassanngaanniillu Maniitsumut, Nuummut Ilulissanullu ingerlaqqissallutik. Kujataanut januaarimi angalanissartik naatsorsuutigaat, taamaalillutik siorna angallavigisimasatik tikeqqissinnaaniassagamikkik.