Ilisimatuut sulisullu imminnut qanillattorput

- Isumasioqatigiinneq qulequtaqarpoq "Ilisimasamiit iliuuseqarnermut", malugusinnaavaralu isumasioqatigiinnermi peqataasut qulequtaq isumaqatigalugu pimoorussisut, Christina Schnohr, Ilisimatusarfimmi Administrationimi ilinniartitsisoq taama naliliivoq. Taanna Nunamedimi isumalioqatigiinnermi pingajussaa peqataavoq.

Christina Schnohr isumaqarpoq, Nunamedip qanilaassuseq pilersikkaa. Tassa ilisimatuut, paasisanik nutaarluinnarnik nassartut, inunnik, isuimaginninnermik peqqinnissamillu ulluinnarni suliaqartunik, naapitsisaramik.

Ilisimatuut taamaalillutik misissuisimanerminni inerniliussatik, sulisunut misilittagalinnut misiligarsinnaasarlutigit.

Christine Schnohr nassuiaavoq, ilisimatuut misissuinermi inerneri inuiaqatigiinnut siammarneq ajortut, ilisimatuulli allat kisiisa paasisinnaasaannik misissuisimanerit saqqummertarlutik. Tamanna Nunamedip allanngortissinnaagaa Christine Schnohr isumaqarpoq.

- Nassuiaagaangatta, ilisimatuut allat kisimik paasisinnaasaannik nassuiaasarpugut, taamaasilluni inuiaqatigiinni inuit allat paasisinnaanngisaannik nassuiaasarluta. Maanili isumasioqatigiinnermi ulluinnarni suliaqartut issiaqatigivagut oqaloqatigillugillu. Taamaannera inuiaqatigiinnut angisuumik tunniussisinnaavoq, oqarpoq.