Ilisimatuut sapaatit-akunnerini marlunni nanorpassuarnit unngussaaqqasut
Umiarsuaq ikiuiartortoq tikimmat, qimmit qummoroortaatillu atorlugit nannut qimaatinneqarsinnaasimapput, ilisimatuullu tallimaasut - ilaatigut aappariit marluk - aniguisinneqarlutik.
Ilisimatuut Sibiriap avannaatungaani qeqertami Troynoymi russit silasiorfianni sulipput. Sapaatit-akunneri marluk matuma siorna nannunit inersimasunit qulinit piaraannillu qaninngoorneqalerput, nanorlu arnaviaq illup ilisimatuut najugaqarfiata igalaavata ataani unnuisarsimavoq.
Nannut qummoroortaatit atorlugit qimaatinniartarsimavaat qummoroortaatinilli nunguutsisimallutik, aamma silasiorfiup qimmiisa marluusut aappaat nannut sivitsunngitsoq toqussimavaat.
Ilisimatuut aninaveeqqasut ulloq unnuarlu illumiiginnaqqullugit oqartussaasunit ilisimatinneqarsimapput. Russilli ilisimasassarsiortut umiarsuaat qeqertap ungasinngisaaniittoq ikiuiartorluni tikimmat ilisimatuut unngussimaneqarnerminnit aniguisinnaasimapput.
Tamanna sioqqullugu ilisimatinneqarsimagaluarput qaammat ataaseq qaangiuppat aatsaat umiarsuarmik tikittoqarumaartoq.
Ilisimatuut nannunit unngussimaneqaleramik silasiorfimmi sulinertik unitsittariaqarsimavaat, nannulli qimaatinnerisa kingorna sulinertik nangeqqissinnaalerlugu.
Qeqertami Troynoyimi silasiorfiup nannunit qaninngoorneqartarnera siornatigut ajornartorsiutaasarsimavoq, aatsaalli taama amerlatigisunik unngussimaneqartoq, Ruslandimi oqartussaasut aviisimut Daily Mailimut oqaatigaat.
