Ilisimatuut: Nunatsinni umimmaat amerlassusaat oqaatigiuminaappoq

Umimmaat pillugit immikkut ilisimasallit nunarsuatsinni umimmaat amerlassusaat, ineriartornerat siammmarsimanerallu pillugit erseqqussaapput. Pinngortitaleriffimmit, Christine Cuyler suliniummi tassani aqutsisuuvoq.

Misissuinermi umimmaat allamut nuunneqarsimasut, nunatta kitaani takuneqartartut ukiuni qulikkaani kingullerni amerlisimasut ilaatigut allassimavoq.

Tamatumanilu pissutaasut assigiinngitsuusut, Pinngortitaleriffiup tusagassiuutinut nalunaarummi paasissutissiissutigaa.

Silap pissusiata allanngoriartornera, allannguutit inunnit pilersinneqartut, naasortortut noorarnerat, kiisortut nappaatillu umimmannut unammillernarnerpaapput. Issittumi naasut nutaat naajoraleruttorput. Mingutsitsinerlu umimmaat amerlassusaannut navianartorsiortitsivoq.

Umimmaat qiviui maannakkornit siunissami soqutiginarnerulersinnaanerat aamma aarlerinarpoq. Umimmaat qiviui ”issittup kuultiatut” aamma taaneqarpoq, ilisimatuullu nunatsinni uumasut amii piinnarlugit toqunneqartarnerannut assersuutissaqarnerarpaat.

Nunatsinni amerlassusaat eqqortoq ilisimaneqanngitsoq

Nunatsinni qanorpiaq umimmaqartiginersoq ilisimatuut ilisimanngilaat. Nunatta kitaata sineriaanut nuunneqarnikunik nunattalu avannaata kangiani pioreersunik umimmaqarpoq.

Ilisimatuut umimmaqatigiit 12-iusut nalunngilaat – ilisimatuulli umimmaat amerliartornersut ikiliartornersulluunniit ilisimaneqanngitsutut inernilerpaat: Kalaallit Nunaanni umimmannik kisitsinissamut ”nuna angallaffigiuminaatsoq aningaasassaaleqinerlu” killilersuisuusut kisitsinerlu iluamik aaqqissugaanngitsorujussuusoq, Pinngortitaleriffik suliaq pillugu paasissutissiivoq.

Ilisimatuut erseqqissaapput, ”umimmannik kisitsisarnerit piaartumik akulikittumik nalinginnaasumillu ingerlanneqartarnissaannut aaqqissuussinissaq pisariaqarluinnartoq, Kalaallit Nunaanniinnaanngitsoq aammali nunat killeqarfii akimorlugit piaartumik taamatut aaqqiisoqartariaqartoq oqaatigineqarpoq, taamaasilluni ineriartornerit nikerarnerillu assersuunneqarsinnaalerniasssammata”.

Nunarsuatsinni umimmaqatigiit ilisimaneqartut 55-iupput, umimmaat taakku katillugit 170.000-it missaanniipput.

Umimmaat nuunneqarsimasut ukiuni kingullerni qulikkaani amerlipput. Aamma Umimmaat Nunaanni Canadallu nunavissuaniittut amerlisimapput.