Ilisimatuut naartusunut mianersoqqusipput: Naatitat meeqqanik sianiitsitsilersinnaapput

Danskit ilisimatusarnermi misissuineranni toqunartunik tissalukaarussassanik atuartut 144-t anaanallu 145-t quuanni annertuumik nassaarsimapput. Ilisimatuussutsikkut misissuinerup ilanngullugu paasinarsisippaa taama annertussuseq qaratsap ineriartorneranut akornutaasoq, taamaattumillu naartusut meeqqallu økologiskinik nerisarnissaat kajumissaarutigaat.
Assi © : Sinead Stout/Flickr
Allattoq Camilla Dam
maajip 18-at 2016 16:03
Nutserisoq Connie Fontain

Toqunartut tissalukaarussassat, pesticidinik taaneqartartut, naasupilunnut naasorissaanermilu naatitat ajutaannut akiuinermi atorneqartarput. Inuit misiliutit 90 procentiisa quui pesticideqarput. USA-milu assinganik misissuinernit tamanna annertuneruvoq.

- Soqutiginartortaa uaniippoq amerikamiut meeqqat malinnaaffigisimavaat. Tamassumalu takutippaa anaanat naartunerminni pesticidertalinnik nerisaqartarsimaangata meeqqat atualernerminni pikkorissutsiminnik misilitsikkaangamik allanit angusarlunnerusartut, SDU-mi avatangiisinut tunngatillugu nakorsaariaatsimut professori, ilisimatuullu siulersuisuat Philippe Grandjean DR-imut oqarpoq

Avatanngiiseqarnermulli aqutsisoqarfiup nammineq aningaasaliiffigisammi misissuineri annilaanngassutiginngilai. EU-milu naliliussat qaangeqqusaanngitsut europami naasorissaasarnermi malinneqartartut aqutsisoqarfiup unnersuussutigaa.

Inuit teriarsuarniit silatunerusut

Naliliussalli pisoqalinikuusut Philippe Grandjean isumaqarpoq. Taakku teriarsuarnut misiliutaapput, inuillu qarasaat taakkunannga siuarsimanerupput, ilisimatooq oqarpoq.

- Uagut imaliorpugut, USA-milu imaaliorput, meeqqanik inunnillu ilumoortunik misissuivugut. Uagut teriarsuarniit sianiutitta katitigaanerat allaanerujussuuvoq, taamaammat aamma sunnertianerujussuupput.

- Takusinnaasimavarpullu qanoq pesticidinik sunnerneqarsimatiginerup meeqqat silatussusaata ineriartorneranut ajornerulersitsitigisarnera, Philippe Grandjean oqarpoq.

Økologiskinik nerisarit

Arnallu naartusunut professori erseqqissumik kajumissaarutissaqarpoq:

- Tassa økologiskimik nerisarnissaq. Naatsitanillu økologiskinik pissarsisinnaanngikkaanni qallunaat nunaanneersut nunanit allaneersunit pitsaanerupput.

Ilisimatuussutsimik misissuinermit nalunaarusiaq tuluttoortoq tamakkerlugu uani atuarsinnaavat.

- Kisianni arnat naartusut tamarmik ernereernissammi tungaanut økologiskiusunik nerisaqartarnissaannik siunnersorpakka. Meeraaqqallu økologiskinik aamma nerisaqartarnissaat isumageqqullugit, Philippe Grandjean oqarpoq.

Inunni misissuiffigineqartuni toqunartut tissakulaarussassarpassuit nassaarineqartut danskit naasorissaaviini atorneqarnissaat inertequtaapput, taakkuli nunani allani naatsitanik tunisassiorfinni atornissaat inertequtaanngillat.