Ilisimatuut innersuussutaat sinnerujussuarpaat
Siorna qilalukkat qaqortat 165-it pisassiissutaapput, ukiormannalu 200-nik pisassiisoqarpoq. Qernertanut pisassiissutit siornatut amerlatigiinnarlutik 300-uupput.
Qilalukkat qernertat qaqortallu piujuaannartinneqarnissaat iluaqutiginiarneqarnerisalu
aqunneqarnerat pillugu Canadamiut kalaallillu ataatsimiittartoqatigiivisa innersuussutaat sinnerujussuarlugit, Naalakkersuisut qilalugartassanik aalajangersaapput. Qilalukkanut qernertanut pisassiissutigineqartut amerlanerpaamik 135-unissaat qaqortallu 100-uunissaat, ataatsimiittartoqatigiit innersuussutigigaluarpaat. Tassa uumasunik ilisimatuut innersuussutaat marloriaammik sinnerlugit amerlanerusunik naalakkersuisut pisassiipput.
Naak naalakkersuisut nuna tamakkerlugu pisassiissutaat aalajangiunneqareeraluartut, kommuninut agguataarneqarnerat kinguaattoorfiuvoq. Kommunikkaartumik pisassiineq juulip aallaqqaataa nallertinnagu piareeqqasussaagaluarpoq. Taamaattorli Naalakkersuisoqarfimmi Arfanniarneq pillugu Ataatsimiititaliarsuup ukiumoortumik ataatsimiinnissaata ulapputigineqarnera pissutigalugu, kommunikkaartumik agguaassinerup juuli naatinnagu pinissaa naatsorsuutigineqarpoq.
Agguaassineq naammassitinnagu qilalukkanik piniartoqaqqusaanngilaq. Pisassiissutit ukiormanna juulip aallaqqaataanit 2009-mi juunip 30-annut atuuttussaapput.
