Ilisimatuut inerniliussaat Issittumi Siunnersuisoqatigiit peersimavaat
Issittumi Siunnersuisoqatigiit paasissutissanik killersuisutut pasillerneqarput:
Nunarsuarmi uuliap sisamaraarterutaa issittumiittoq qanoq qallorneqassanersoq avatagiisillu qanoq migutsinnaveersaarneqarsinnaanersut, ilaatigut tamakkuninnga imaqarluni, Uulia gassilu pillugit AMAP tassa Issittumi Pinngortitamik Nakkutilliisoqarfik Nalilersuiffiullu nalunaarusiaa imaqartoq, Tromsømi Issittumi Siunnersuisoqatigiit sapaatip akunnerata siuliani ataatsimiinneranni atsioqatigiissutigineqarpoq.
Nalunaarusiamiilli ilisimatuut inerniliussaat siunnersuutaallu atsioqatigiittoqannginnerani peerneqarput. Tassa Naalagaaffiit USA Sverigelu suli nalunaarusiap inernerinik siunnersuutaanillu tamakkiisumik misissuinertik tunngavigalugu nalunaarusiaq ilaannakortoq isumaqataaffigigamikku.
- Naalagaaffiit peqatigiiffiillu issittumi siunnersuisoqatigiinni ilaasortaasut isumaqatigiillutik nalunaarusianik saqqummiussisaarput, Kalaallit Nunaanni Inuit Issittormiut Siunnersuisoqatigiiffiani siulersuisuni ilaasortaq, Carl Christian Olsen oqarpoq. Inuit issittormiut Siunnersuisoqatigiiffiannit issittumi siunnersuisoqatigiit ataavartumik ilaasortaaffigineqarpoq.
Politikenimi ullumi saqqummersumi nalunaarusiap inerneri siunnersuutaalu peerlugit atsioqatigiisutigineqarsimanera uparuarneqaraluarpoq.
Amerikamiut issittumi uuliasiornissamik soqutigisaqarlutuik nalunaarusiami inernernik siunnersuutinillu isumaqataannginnerarlugit.
Taamaattorli Issittumi Uulia gassilu pillugit nalunaarusiaq maangaannanngilaq. Ukiup ingerlanerani ilisimatuut inerniliussaat siunnersuutaallu Issittumi siunnersuisoqatigiit ataatsimiineranni saqqummiunneqassapput.
- Ruslandimi Kalaallit Nunaannilu uuliasiornissamik soqutiginnittoqarpoq, maannamullu paasisat nalunaarusiami saqqummiunneqartut innuttaasut akornanni ammasumik oqallisigineqarsinnaanngorput, Carl Christian Olsen oqarpoq.
