Akiuussutissaq inunnut 18-init 55-inut ukiulinnut, peqqissunut 45-nut sapaatini-akunnerani arfinilinni misileraatigineqassaaq.Assi: John Moore/AFP/Ritzau Scanpix

Ilisimatuut coronamut akiuussutissaasinnaasoq siulleq inummut misiliutigigaat

Coronamut akiuussutissamik nassaarniarneq sukkasoorujussuarmik ingerlanneqarlunilu pingaarnerpaatinneqarpoq, peqqinnissamut sullissivik oqarpoq.

Seattlemi amerikamiut ilisimatuut coronamut akiuussutissaasinnaasoq inummut siullermeertumik ataasinngormat misiliutigaat.

US National Institutes of Health (NIH) amerikamiut peqqinnissamut ministeriata ataaniittoq taama nalunaaruteqarpoq.

Inuusuttuaqqanik marlunnik meeralik, 43-nik ukiulik, Jennifer Haller inunnit siulliulluni misiliutigineqarpoq. Taanna Seattlemi najugaqarpoq. Taassuma kingorna allat qassiiusut aamma tuimikkut misiliutissamik kapineqassapput.

Akiuussutissaq inunnut 45-nut misileraatigineqassasoq

Akiuussutissaq inunnut 18-init 55-inut ukiulinnut, peqqissunut 45-nut sapaatini-akunnerani arfinilinni misileraatigineqassaaq.

- Akiuussutissamik misileraaffigineqartoq siulleq ippassaq kapineqarpoq, NIH tusagassiuutinut nalunaarummi allappoq.

Misileraatitut akiuussutissaq taanna mRA-1273-imik atserneqarpoq. Taannalu NIH-mi ilisimatuut sananeqaatit uumassusillit pillugit sulliffeqarfiup Modernap amerikami nunap immikkoortuani Massachisettsimi Cambridgeimiittup suleqatigineratigut ineriartortinneqarpoq.

Akiuussutissat piaartumik suliassaasoq

Coronavirusimimut akiuussutissamik nassaarnissaq ”innuttaasut peqqissusaannut atatillugu tuaviuussassatut pingaarnerpaavoq”, coronavirus kisitsisit kingulliit naapertorlugit nunarsuatsinni innuttaasut 7000-init amerlanerusut toqqutigaat.

NIH-mi nappaatit tunillannartut pillugit immikkoortortaqarfimmi pisortaq, Anthony Fauci oqarpoq.

- Ilisimatusarnermi matumani sukkangaatsiartumik suliarineqartumi suliarineqarnerata aallartinneranit anguniakkamut alloriarnerni pingaartuni siulliuvoq, taanna oqarpoq.

Ukiup ataatsip missaa suli suliarineqassasoq

Tamanna maannamut alloriarneq siulliinnaavoq. Akiuussutissap misilerarneqareerluni nioqqutigineqalersinnaanissaanut suli ukiumik ataatsimit marluk affaanut sivisussuseqarsinnaasoq, nutaarsiassaqartitsivik, AFP allappoq.

Nunat tamalaat peqqissutsimut suleqatigiiffiata (WHO) nunarsuaq tamakkerlugu tunillaassuunneruneragaanut coronavirusimut maannamut suli akiuussutissaqanngilaq.

Nakorsaatileriffiit ilisimatuullu nunanit tamalaaneersut coronavirusimut nutaamut akiuussutissamik ineriartortitsiniarlutik sulissuteqarput.

/ritzau/

Isummersuutit