Ilisimatusartut innuttaasunik pikialaaqatiserinnipput

Kangerlussuarmi, Sisimiuni, Sarfannguani Nuummilu tallimanngornermiit aallartittumik pisussat arlalippassuit sapaatip akunnerata ataatsip ingerlanerani aaqqissuunneqassapput. Ullunilu taakkunani ilisimatusartut nunarsuarmi sumiiffinnit tamalaaneersut nunatsinni ilisimatusarneq pillugu oqallinnissamut qaaqqusipput.

Greenland Science Weekimi pisussarpassuit ilisimatusarfinniit oqartussaqarfinniillu assigiinngitsunit aaqqissuunneqarput.

Nunatsinni sila pillugu ilisimatusarfik Mie S. Windingimit ingerlanneqartoq taakkununnga ilaavoq. Taassuma Greenland Science Week pingaaruteqarnerarpaa, nunatsinnimi ilisimatusarnernit paasisat tamanut paasissutissiissutiginissaat aaqqissuussinermi ilaatigut qulakkerniarneqarpoq. 

- Inuusuttunut isumassarsiorfiusinnaavoq inuiaqatigiittullu ilungersuutigisatsinnut aaqqiissutissanik nassaarfiusinnaalluni. Silap pissusiata allanngoriartorneranut imaluunniit attaveqaasersuutinut tunngasinnaavoq.

- Taamaalillutik ilisimatusartut aamma aaqqitassat sorliit sukumiinerusumik misissornissaannut isumassarsiornissamik immikkuullarilluinnartumik periarfissaqalissapput,KNR- imut oqarpoq.  

Takornariaqarneq qanoq pitsaanerpaamik pissarsiffigissavarput?

Mie S. Windingip oqarnera naapertorlugu nunatsinni ilisimatusartut hunnorujulikkaat nunanit assigiinngitsuneersut soorlu Finlandimeersut, USA-meersut Japanimeersullu Greenland Science Weekimi peqataasarput.

Taakku Greenland Science Weekimi sammineqartussat ilaanni soorlu takornariaqarnermut attaveqaasersuutillu pillugit oqallinnernut ilaatigut ilaassapput.

Ilisimatusartut, takornarialerisut soqutigisaqartullu allat ATV-nut aqqutissaq, Kangerlussuarmut Sisimiunullu atassusiisussaq qanoq iliornikkut takornarianut amerlanerusunut pilerinarsaataasinnaanersoq  Kangerlussuarmi, Sisimiuni Sarfannguanilu novembarip pingajuannit arfernanut oqallisigissavaat.Tamatuma saniatigut Aasivissuit Nipisallu eqqaat, UNESCO-mi nunarsuarmioqatigiinnut eriagisassanngortinneqarsimasoq, qanoq iliornikkut qajassuunneqarsinnaanersoq ilaatigut aamma oqaluuserissavaat.

Akeqanngilat kikkullu tamarmik tikilluaqqusaapput

Ilisimatusarnerup silarsuaa matoqqavallaarnerarlugu piffissap ingerlanerani isornartorsiorneqartarpoq. Taamaammat Arctic Hubip allattoqarfiani aqutsisuugallartup Jula Maegaard Hoffmannip aaqqissuusseqataasup innuttaasorpassuit aaqqissuussinerpassuarnut peqataanissaat neriuutigaa, taamaalilluni pikialaarneq anguneqassalluni.

- Soqutiginnittut tamarmik takkullutik soqutiginninnerminnik ilisimasaminnillu siammarterinissaat neriuutigaarput, taamaaliornikkut ilisimatusartut inuiaqatigiillu akornanni soqutiginartumik oqallittoqarsinnaaniassammat.

Greenland Science Weekimi pilersaarutit aaqqissuussap ingerlanerani nutarterneqartartussat uani takuneqarsinnaapput.